ထုတ်ဝေခွင့်ပြုထားပေမယ့် လက်တွေ့ ထုတ်ဝေနိုင်ခြင်း မရှိတဲ့ သတင်းစာ ၁၂ စောင် ရှိပြီး အဲဒီအထဲက ၇ စောင်ဟာ မထုတ်ဝေတော့ဘူးဆိုပြီး ပြန်ကြားရေးဝန်ကြီးဌာနဆီ လိုင်စင် ပြန်အပ်ထားတယ်လို့ စာနယ်ဇင်းလုပ်ငန်းဌာနရဲ့ ညွှန်ကြားရေးမှူး ဦးဝင်းဇော်ဌေးက ပြောပါတယ်။

ဇန်န၀ါရီ ၁၃ ရက် နေပြည်တော် ပြန်ကြားရေးဝန်ကြီးရုံးမှာ လုပ်တဲ့ သတင်းစာရှင်းလင်းပွဲမှာ သူက ခုလို ပြောလိုက်တာ ဖြစ်ပြီး ပြန်အပ်တဲ့အထဲမှာ ဒေါ်အောင်ဆန်းစုကြည်နာမည်နဲ့ လိုင်စင် ထုတ်ပေးထားတဲ့ ဒီလှိုင်းသတင်းစာလည်း ပါတယ်လို့ သူက ပြောပြပါတယ်။

လက်ရှိ လိုင်စင်ပြန်အပ်ထားတဲ့ သတင်းစာ ၇ စောင်ကတော့ ဒီလှိုင်း၊ ခေတ်မိုး၊ နောက်ဆုံးရနေ့စဉ်၊ Daily Eleven News၊ မြန်မာနေ့စဉ်၊ ၀ရဇိန်နေ့စဉ်၊ People Net Daily သတင်းစာတွေ ဖြစ်ပါတယ်။

ဒေါ်အောင်ဆန်းစုကြည်နာမည်နဲ့ ကျထားတဲ့ ဒီလှိုင်းသတင်းစာကိုတော့ အရင်းအနှီး ငွေကြေး မလုံလောက်လို့ ထုတ်ဝေခြင်း မပြုတာလို့ အန်အယ်လ်ဒီပါတီရဲ့ တာဝန်ရှိသူတွေက ပြောဆိုထားပါတယ်။

လက်ရှိ ပြည်တွင်းမှာ ထုတ်ဝေနေတဲ့ သတင်းစာ စုစုပေါင်း ၁၈ စောင်ရှိသွားပြီ ဖြစ်ပါတယ်။