ရန်ကုန်တိုင်း၊ မင်္ဂလာဒုံမြို့နယ်မှာ နိုဝင်ဘာ ၇ ရက်နေ့ တရက်တည်းမှာ အပြင်းစား ပစ်ခတ်မှု သုံးကြိမ် ဖြစ်ပွားခဲ့ပြီး အကြမ်းဖက် စစ်ကောင်စီတပ်သား ၃ ဦးနဲ့ အရပ်သား သန့်ရှင်းရေးအကူ ဈေးသည် ၁ ဦး သေဆုံးခဲ့တယ်လို့ သိရပါတယ်။
မနေ့ မွန်းတည့် ၁၂ နာရီခွဲ ဝန်းကျင်က မင်္ဂလာဒုံမြို့နယ် သင်္ဃန်းကျွန်းကြီး ကျေးရွာ အုပ်စုရှိ အထွေထွေအုပ်ချုပ်ရေးမှူးရုံးနဲ့ Terminal ဆီဆိုင်အကြားရှိ ဂိတ်စောင့်နေတဲ့ စစ်သားတွေကို တက္ကစီကားပေါ်မှ ပစ်ခတ်မှု ဖြစ်ပွားခဲ့ပြီး အစောင့်စစ်သား ၁ ဦးနဲ့ အရပ်သား သန့်ရှင်းရေးအကူ ဈေးသည် ၁ ဦး သေဆုံးကာ အစောင့် စစ်သား ၁ ဦးဒဏ်ရာ ရရှိခဲ့တယ်လို့ ဒေသခံ တစ်ချို့ရဲ့ ပြောကြားချက်အရ သိရပါတယ်။
နေ့လယ် ၁ နာရီခွဲလောက်မှာတော့ “လုပ်ချင်ရင် တပ်ရင်းကို လာလုပ်လှည့်” ဟု ကြိမ်းဝါးထားတဲ့ တပ်ရင်းမှူးရှိရာ တပ်ရင်း (၉) နဲ့ လန်ဒန်စက်ရုံအကြားတွင် ပစ်ခတ်မှုနဲ့ ပေါက်ကွဲမှုများ ဖြစ်ပေါ်ခဲ့တာပါ။
နောက်ထပ်တစ်ကြိမ်ကတော့ နေ့လယ် ၂ နာရီခွဲဝန်းကျင်ခန့်က မင်္ဂလာဒုံ မြို့နယ် ခရေပင်ရိပ်မွန်အိမ်ရာ အနန်းပင် လေတပ်အနီး ထပ်မံပစ်ခတ်မှု ဖြစ်ပွားခဲ့ပြီးနောက် လေတပ်သား ၂ ဦး သေဆုံးခဲ့ပြီး ၂ ဦးဒဏ်ရာ ရရှိခဲ့တယ်လို့ သိရပါတယ်။
ပထမနှစ်ကြိမ်ဖြစ်ပွားမှုအပြီး အကြမ်းဖက်စစ်ကောင်စီတပ်တွေ မင်္ဂလာဒုံ အဝင်အထွက် အမှတ် (၃) လမ်းမတစ်လျှောက်နဲ့ ထောက်ကြန့်မြို့တွေမှာ ပိတ်ဆို့ရှာဖွေမှုတွေ ပြုလုပ်နေစဉ်မှာပဲ မင်္ဂလာဒုံမြို့နယ် တောင်ပိုင်း အနန်းပင်လေတပ်အနီးမှာ တတိယအကြိမ် ထပ်မံပစ်ခတ်မှု ဖြစ်ပွားခဲ့တာပါ။
