ဧရာဝတီတိုင်း ပုသိမ်မြို့အခြေစိုက် အနောက်တောင်တိုင်းစစ်ဌာနချုပ် (နတခ) မှာ တပ်တွင်း သတင်း တွေ ပေါက်ကြားမှုနဲ့ စစ်မှုထမ်းဟောင်း မိသားစုဝင် ၄ ယောက်ကို စစ်အာဏာရှင်တပ်က ပြန်လည် ဖမ်းဆီးထားတယ်လို့ တပ်နဲ့နီးစပ်သူတွေဆီက သိရပါတယ်။
မေလ ဒုတိယအပတ်က ပုသိမ်မြို့အခြေစိုက် အနောက်တောင်တိုင်းစစ်ဌာနချုပ် (နတခ) တပ်ဝန်းထဲ မှာ နေထိုင်တဲ့ စစ်မှုထမ်းဟောင်း အရာခံဗိုလ်ရဲ့ သားတယောက် အပါအဝင် ၄ ယောက်ကို တပ် အတွင်းသတင်း အပြင်ပေါက်ကြားမှုနဲ့ စွပ်စွဲကာ စစ်ဘက်ရေးရာ လုံခြုံရေးတပ်ဖွဲ့ (စရဖ) က ဖမ်းဆီးထားတာလို့ ဆိုပါတယ်။
တပ်နဲ့နီးစပ်သူတယောက်က “တပ်လိုင်းခန်းထဲမှာနေတဲ့ စစ်မှုထမ်းဟောင်း မိသားစုဝင်တွေထဲက သတင်းပေါက်ကြားမှုနဲ့ ဖမ်းခဲ့တာ။ ပြင်ပကို အတွင်းသတင်းတွေ ပေးတယ်ဆိုပြီး စွပ်စွဲဖမ်းခဲ့တာ။ ဘယ်သတင်းကြောင့် ဆိုတာတော့ မသိဘူး” လို့ ပြောပါတယ်။
တပ်တွင်းသတင်းပေါက်ကြားမှုနဲ့ စစ်မှုထမ်းဟောင်း မိသားစုထဲက အမျိုးသမီးတယောက်၊ အမျိုးသား ၃ ယောက်ကို စစ်အာဏာရှင်တပ်ရဲ့ စရဖက ဖမ်းဆီးခဲ့တာလို့ သိရပါတယ်။
ပုသိမ်(နတခ)တပ်တွင်းသတင်း ပေါက်ကြားမှုနဲ့ စစ်မှုထမ်းဟောင်း မိသားစုဝင် ၄ ယောက် ဖမ်းဆီး ခံရတာနဲ့ ပတ်သက်လို့ တပ်တွင်း ခွဲခြားဆက်ဆံခံရမှုတွေ ရှိနေတယ်ဆိုကာ တပ်တွင်း မကျေနပ်မှု တွေ မြင့်တက်နေတယ်လို့ သိရပါတယ်။
