မြန်မာရွှေ့ပြောင်းလုပ်သားတွေ အများအပြားရှိရာ ထိုင်းနိုင်ငံအလယ်ပိုင်း စမွတ်ပရကန်မြို့မှာ ဩဂုတ် ၂၉ ရက် မနေ့ညက တညလုံး မိုးသည်းထန်စွာ ရွာသွန်းခဲ့တဲ့နောက် ဒီမနက်မှာတော့ လူနေအိမ်ခြေရပ်ကွက်တွေထဲ ရေကြီးနေပါတယ်။ 

အထူးသဖြင့် ဘန်ဖူးရပ်ကွက်နဲ့ ဘန်ဖရီရပ်ကွက်- စက်မှုဇုန်ထဲမှာဆိုရင် ရေတွေဟာ အမြင့် ၁ မီတာထိ တက်လာတာကြောင့် မော်တော်ကားနဲ့ ဆိုင်ကယ်တွေ ရေနစ်နေပြီး ပစ္စည်းတွေလည်း ပြောင်းရွှေ့သယ်ထုတ်ဖို့ရာ အလျင်မမီတာကြောင့် ဆုံးရှုံးမှုတွေများ နေကြောင်း၊  အီလက်ထနော နစ်စက်ရုံနဲ့တကွ အခြားစက်ရုံအလုပ်ရုံတွေပါ ပိတ်ထားရတယ်လို့ ချနယ်လ် ၈ တီဗွီသတင်းမှာ ဖော်ပြပါတယ်။

ရေကြီးလို့ လမ်းတွေပိတ်နေတာကြောင့် ရေထဲပိတ်မိသူတွေ ရှိနေပြီး ကယ်ဆယ်ရေးအဖွဲ့က ထမင်းထုတ်တွေလိုက်ဝေနေကာ တဘက်ကလည်း ရေတွေစုတ်ထုတ်နေတယ်လို့ သတင်းမှာ ဖော်ပြပါတယ်။

စမွတ်ပရကန်စက်မှုဇုန်ထဲမှာ မြန်မာလုပ်သားတွေလည်း အမြောက်အမြားဝင်ရောက် လုပ်ကိုင်နေပါတယ်။