အာဏာသိမ်းစစ်ခေါင်းဆောင်နဲ့ ဆက်နွှယ်ပတ်သက်နေသူလို့ ဝေဖန်ခံနေရပြီး မြန်မာနိုင်ငံကို အကြိမ်များစွာဝင်ထွက်နေတဲ့ ဂျပန်-မြန်မာအသင်းဥက္ကဋ္ဌ  မစ္စတာ ဝတနဘဲဟီဒဲအိုကို ဂျပန်ရောက်မြန်မာနိုင်ငံသားက ဩဂုတ် ၂၅ ရက်ညနေပိုင်းက တိုကျိုမြို့က အဆိုပါအသင်းရုံးခန်းရှေ့မှာ ဒုတိယအကြိမ်ဆန္ဒပြခဲ့ကြပါတယ်။

ဦးဆောင်သူတဦးဖြစ်တဲ့ မသိရီသစ္စာက “စစ်တပ်က မတရားသဖြင့် အာဏာသိမ်းပြီး ပြည်သူတွေကို မတရားအကြမ်းဖက်သတ်ဖြတ် နေတာကို လျစ်လျူရှုကာ မြန်မာပြည်သူတွေအကျိုးထက် ကိုယ်ကျိုးစီးပွားကိုအခြေခံပြီး စစ်အုပ်စုကို နောက်ကွယ်က အပေးယူများပြုနေပြီး စစ်အုပ်စုအလိုကျ မမှန်မကန်သတင်းတွေကို ဂျပန်အစိုးရနဲ့ ဂျပန်ပြည်သူတွေကို ဆက်လက်ဖြန့်ဝေနေတာကြောင့် အခုလို ဒုတိယအကြိမ် လာရောက်ဆန္ဒပြရတာ” လို့ ဒီဗွီဘီကို ပြောပါတယ်။

ဦးဆောင်သူ နောက်တဦးဖြစ်တဲ့ မဆွေဆက်အေးက “ပထမအကြိမ်ဆန္ဒပြပွဲကို ဧပြီလက ပြုလုပ်ခဲ့ပြီး ကျမတို့မြန်မာပြည်သူတွေရဲ့ သဘောထား တောင်းဆိုထားတာတွေကို လျစ်လျူရှုကာ စစ်ကောင်စီကို ဆက်လက်ဆက်ဆံနေတာဖြစ်လို့ ဒီအသင်းကြီး ဆက်မရှိသင့်တာကြောင့် အခုလို ဆန္ဒပြပြုလုပ်ရတာ” လို့ ရှင်းပြခဲ့ပါတယ်။

ဆန္ဒပြပွဲကို ဂျပန်ရှိမြန်မာတိုင်းရင်းသားအဖွဲ့အစည်းအသီးသီးနဲ့ မြန်မ့ာအရေးစိတ်ဝင်စားတဲ့ ဂျပန်လူမျိုး များစုစုပေါင်း ၂၀၀ နီးပါး လာရောက်ခဲ့ပါတယ်။

ဂျပန်အစိုးရက စစ်ကောင်စီကို အသိအမှတ်မပြုကြောင်း တရားဝင်ပြောကြားထားတဲ့ ကြားက ဂျပန်မြန်မာအသင်းအင်တာနက်စာမျက်နှာမှာ ဂျပန်စီးပွားရေးလုပ်ငန်းတွေ စစ်ကောင်စီ အောက် မြန်မာနိုင်ငံမှာပြန်လည်စတင်ဖို့ ပြင်ဆင်နေတာတွေ့ရလို့ ဂျပန်အန်ဂျီအိုတွေ အနေနဲ့ ဂျပန်အစိုးရကို မေးမြန်းဖိအားပေးရမယ်လို့လည်း ဆန္ဒပြပွဲမှာ လာရောက်ပူးပေါင်းခဲ့သူ တိုကျိုခြေစိုက်ဂျပန် အန်ဂျီအို FOEမှ မစ္စ စပ်ချီ ခဝက  ဒီဗွီဘီကို ပြောပါတယ်။

မစ္စတာ ဝတနဘဲဟာ စစ်အာဏာမသိမ်းခင် သီတင်းပတ်ကလည်း မြန်မာပြည်ကို ရောက်ရှိခဲ့ပြီး အာဏာသိမ်း ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့ကာ  သူတို့နှစ်ဦးအကြား သားအဖသဖွယ် ရင်းနှီးဆက်ဆံမှုတွေ ရှိတယ်လို့ သူနဲ့ နီးစပ်သူတွေကပြောကြပါတယ်။

ဗိုလ်ချုပ်မှူးကြီးမင်းအောင်လှိုင်ကို ပြည်သူတွေအပေါ် အကြမ်းဖက် သတ်ဖြတ်မှု ပုဒ်မ၃၀၂ နဲ့ တရားစွဲတင်အရေးယူရင် မစ္စတာ ဝတနဘဲဟာလည်း မြန်မာပြည်သူတွေကို သတ်ဖြတ်မှုအတွက် အားပေးကူညီသူ ကြံရာပါအဖြစ်ပုဒ်မ ၃၀၄ အမှုမြောက်ကြောင် ဆန္ဒလာပြသူ ယိုကိုဟာမားနေ ဦးဝင်းကျော်က  ပြောပါတယ်။

ဂျပန်- မြန်မာအသင်းဥက္ကဋ္ဌဟာ အာဏာသိမ်းပြီးနောက်မေလ ၁၄ ရက်နေ့ကမြန်မာနိုင်ငံကို သွားရောက်ခဲ့ကာ အာဏာသိမ်းစစ်ကောင်စီခေါင်းဆောင် မင်းအောင်လှိုင်နဲ့ ၂ ကြိမ် တွေ့ဆုံခဲ့သလို စက်တင်ဘာလထဲမှာ မြန်မာပြည်ကိုထပ်မံသွားရောက်ဖို့ ပြင်ဆင်နေတာဖြစ်ပါတယ်။