ကရင်ပြည်နယ်၊ မြဝတီမြို့မှာ ကိုဗစ်-၁၉ ကပ်ဘေးကာလ အလုပ်လက်မဲ့ဖြစ်နေသူတွေနဲ့ စားစရာအခက်အခဲတွေ့နေတဲ့ အခြေခံပြည်သူတွေအတွက် ဆန်၊ ဆီ၊ ကြက်ဥနဲ့ တခြားစားသောက်ကုန်တွေကို စီးပွားရေးသမားတွေနဲ့ အဖွဲ့အစည်းတွေက သြဂုတ် ၁၆ ရက်မှာ လှူဒါန်းခဲ့ပါတယ်။
မြဝတီမြို့ အမှတ်(၃)ရပ်ကွက်မှာ စက်သုံးဆီဆိုင်ပတ္တမြားမယ်မိသားစုက အိမ်ခြေ ၁ဝဝဝ အတွက် ဆန် ၅ ပြည်အိတ် ၁ဝဝဝ လှူဒါန်းပေးခဲ့ပါတယ်။ ဗိုလ်မှူးကြီးစောချစ်သူမိသားစုကိုအမှူးထားပြီး ကရင်နယ်ခြားစောင့်တပ်ကလည်း မြဝတီမြို့အမှတ် (၅)ရပ်ကွက်နေ အိမ်ထောင်စု ၅၅၀ အတွက် ဆန်၊ ဆီ၊ ငါးသေတ္တာ၊ ကြက်သွန်၊ အာလူး နဲ့ Mask တွေ ထောက်ပံ့လှူဒါန်းခဲ့ပါတယ်။
မြန်မာ-ထိုင်း နယ်စပ်မြို့ဖြစ်တဲ့ မြဝတီမြို့မှာ မြန်မာနိုင်ငံ ဒေသအသီးသီးမှ လာရောက်လုပ်စားသူတွေလည်း အများအပြားနေထိုင်နေကြပြီး ကိုဗစ်-၁၉ ရောဂါ အခြေအနေ ကြောင့် အလုပ်အကိုင်ရှားပါး အလုပ်လက်မဲ့ဖြစ်နေကြကာ မိသားစုတွေ စားဝတ်နေရေး အခက်ခဲများစွာ ကြုံနေကြတာဖြစ်ပါတယ်။
