စစ်ကိုင်းတိုင်း၊ ခင်ဦးမြို့မှာ ဇူလိုင် ၂၂ ရက်နေ့က ကိုဗစ်-၁၉ အတည်ပြုလူနာ ၄၄ ဦးတွေ့ရှိတယ်လို့ ကြက်ခြေနီအသင်းကနေ သိရပါတယ်။
“ရပ်ကွက်နဲ့ကျေးရွာ ၁၄ ခုက လူထုကို Test kit နဲ့ စစ်ဆေးတာ ကိုဗစ်အတည်ပြု ၄၄ ဦးတွေ့တယ်။ ကိုဗစ်တတိယလှိုင်းမှာ အတည်ပြုလူနာ အများဆုံးတွေ့ခဲ့တာ”လို့ကြက်ခြေနီအသင်း တာဝန်ရှိသူတစ်ဦးက ပြောပါတယ်။
ခင်ဦးမြို့နယ်မှာ ကိုဗစ်-၁၉ ရောဂါဖြစ်ပွားမှုဟာ ကျေးရွာတွေကအများဆုံးဖြစ်နေပြီး၊ ကိုဗစ်စည်းကမ်းလိုက်နာဖို့ အထူးသဖြင့်လိုအပ်နေပြီလိုလည်း ဆိုပါတယ်။
ကိုဗစ်အတည်ပြုလူနာတွေကို မြို့နယ်ဆေးရုံ Positive စင်တာ၊ ပေါင်းလည်းကုန်းကျေးရွာ Positive စင်တာ၊ အောင်ချမ်းသာ အလက(ခွဲ) Positive စင်တာ၊ စင်တာ ၃ ခုထား ကုသပေးနေပါတယ်။
ခင်ဦးမြို့နယ်မှာ ဇူလိုင် ၁ ရက်မှ ၂၂ ရက်နေ့အထိ ကိုဗစ်အတည်ပြုလူနာ ၂၆၉ ဦး၊ သက်သာပျောက်ကင်းလို့ ဆေးရုံကဆင်းခွင့်ရသူ ၉၅ ဦးရှိကာ သေဆုံးသူ ၃ ဦးနဲ့ လတ်တလောကုသပေးနေသူ ၁၇၁ ဦးရှိတယ်လို့သိရပါတယ်။
