မွန်ပြည်နယ် သံဖြူဇရပ် - မုဒုံကားလမ်း ရေကျော်နေပြီး လက်ရှိမှာ ကားအစီး ၁၀၀ နီးပါး ပိတ်မိနေတယ်လို့ မုဒုံ လူမှုကယ်ဆယ်ရေးအဖွဲ့ တာဝန်ရှိသူတွေက DVB ကို ပြောပါတယ်။

မုဒုံမြို့နယ် နှီးပဒေါကျေးရွာအနီးက သံဖြူဇရပ် - မုဒုံကားလမ်းဟာ ဒီကနေ့ ဇူလိုင် ၂၀ ရက်နေ့ မနက် ၉ နာရီလောက်ကတည်းက ရေကျော်ခဲ့တာဖြစ်ပြီး ညနေ ၄ နာရီခွဲအချိန်ထိ ရေကျသွာတာ မရှိသေးပါဘူး။

သံဖြူဇရပ် - မုဒုံကားလမ်း ရေကျော်မှုကြောင့် ကုန်သည်ယာဉ်အပါအဝင် ခရီးသည်ကား ၁၀၀ နီးပါး ပိတ်နေတယ်လို့ ဆိုပါတယ်။

မုဒုံ လူမှုကယ်ဆယ်ရေးအဖွဲ့ တာဝန်ရှိသူ တစ်ဦးက “နှီးပဒေါကားလမ်း ရေကျော်နေပါတယ်၊ ဒီမှာ ကားအစီး ၁၀၀ လောက်ပိတ်နေတယ်၊ အတက်နိုင်ဆုံး ဒီလမ်းကို လာမယ်ဆိုရင် စုံစမ်းပြီးမှ လာကြပါ” လို့ ပြောပါတယ်။

သံဖြူဇရပ် - မုဒုံကားလမ်းဟာ မွန်ပြည်နယ် သံဖြူဇရပ်မြို့နယ်နဲ့ ရေးမြို့နယ် အပြင် တနင်္သာရီတိုင်းကို အဓိက သွားလာနေတဲ့ လမ်းမကြီးတစ်ခု ဖြစ်ပါတယ်။

လက်ရှိအချိန်ထိ မွန်ပြည်နယ်မှာ မိုးအဆက်မပြတ် ရွာသွန်းနေတဲ့အတွက်ကြောင့် ကားလမ်း ရေကျသွားမယ့် အခြေအနေ မရှိသေးပါဘူး။

သံဖြူဇရပ် - မုဒုံကားလမ်းဟာ နှစ်စဉ် ရေကျော်မှု ဖြစ်ပွားနေတာ ဖြစ်ပြီး၊ အခုလောက်ထိ တစ်ခါမှ အချိန်အကြာကြီး ရေကျော်တာ မဖြစ်ခဲ့ပါဘူး။