သာပေါင်းတွင် မြို့နယ်ပညာရေးမှူးရုံး အနီးဗုံးကွဲ၊ ဝန်ထမ်း ၁ ဦး ဒဏ်ရာရ
DVB
·
May 31, 2021
ဧရာဝတီတိုင်း၊ သာပေါင်းမြို့နယ်မှာ ပညာရေးမှူးရုံးမှာ အစည်းအဝေးကျင်းပနေချိန် မေလ ၃၁ ရက် ဒီနေ့မနက်ပိုင်းက ရုံးနား ဗုံးပေါက်ကွဲခဲ့လို့ ဝန်ထမ်း ၁ ဦးထိခိုက် ဒဏ်ရာရခဲ့တယ်လို့ သိရပါတယ်။
သာပေါင်းမြို့နယ် အထက်တန်းကျောင်းနဲ့ မြို့နယ်ပညာရေးမှူးရုံးနား ကျောင်းဆောင် မြေကွက်လပ်မှာ မနက် ၁၁ နာရီခွဲလောက်က ဗုံးပေါက်ကွဲခဲ့တာလို့ ဒေသခံတွေက ပြောပါတယ်။
"လစာထုတ်အစည်းအဝေး ထင်တယ်၊ အစည်းဝေးလုပ်နေတဲ့ အချိန်လာပစ်တာ မြို့နယ်ရုံးကို ပစ်တာ၊ ခြံစည်းရိုးထိပြီး အထဲမရောက်တာ အဲ့တာကြောင့် အထိခိုက်နည်းတာ''လို့ မျက်မြင်တွေ့သူ တဦးက ပြောပါတယ်။
ဗုံးပေါက်ကွဲခဲ့တဲ့နေရာကို မိနစ်ပိုင်းအကြာမှာ အကြမ်းဖက်စစ်ကောင်စီရဲ့ လက်နက်ကိုင်တပ်တွေ ရောက်ရှိစစ်ဆေးတာတွေပြုလုပ်နေပြီး လုံခြုံရေးတင်းကျပ်ထားတယ်လို့ ဆိုပါတယ်။
သာပေါင်းမြို့နယ်မှာ စစ်တပ်အာဏာသိမ်းမှုနောက်ပိုင်း ပထမဆုံး ဗုံးပေါက်တာဖြစ်ပါတယ်။
