စစ်တပ်ရဲ့အာဏာသိမ်းမှုကို လက်မခံတဲ့ စစ်အာဏာရှင်အလိုမရှိကြောင်း ရေးသားဖော်ပြခဲ့တဲ့ ကြံခင်းမြို့က ရဲ ၂ ဦး ထောင်ဒဏ် ၁ နှစ်စီ ပြစ်ဒဏ်ချမှတ်ခဲ့ပြီး ထောင်ထဲမှာ ၃ လကြာတဲ့အထိ တိုက်ပိတ်ခံထားရတယ်လို့ သိရပါတယ်။

စစ်အာဏာရှင်စနစ်ဆန့်ကျင်ခဲ့တဲ့ ရဲဝန်ထမ်း ၂ ဦးကို ပုသိမ်အကျဥ်ထောင်း ပို့ဆောင်ကာ မိဘတွေနဲ့ တွေ့ခွင့်မပေးတဲ့အပြင် ရဲ ၂ ဦးက ထောင်တွင်းဆန္ဒပြလို့ မတ်လ ၁၈ ရက်နေ့ကစတင်ကာ တိုက်ပိတ်ခဲ့တာလို့ မိသားစုဝင်တွေက DVB ကိုပြောပါတယ်။

"သွားတိုင်းလည်း မတွေ့ရဘူး၊ ပြန်ထွက်လာတဲ့သူတွေက ဖုန်းဆက်ပြောတာသိရတာပါ။ သားတွေက အထဲမှာ ဒီမိုကရေစီရရှိရေး ထပ်ဆန္ဒပြကြတာကို အပြစ်ပေးတဲ့အနေနဲ့ တိုက်ပိတ်ထားတယ်၊ သွားတွေ့တာ ၇ ခါရှိပြီး မတွေ့ရဘူး” လို့ မိခင်ဖြစ်သူက ပြောပါတယ်။

စစ်အာဏာသိမ်းမှုဆန့်ကျင်ခဲ့လို့ ထောင်ရောက်ပြီး မတ်လ ၁၈ ရက်နေ့ကစတင်ကာ ဒီမိုကရေစီရရှိရေးနဲ့ အာဏာရှင်ပြုတ်ကျရေး ဆန္ဒပြခဲ့လို့ ထောင်က သုံးပွင့်နဲ့အရာရှိက မျက်နှာတွေကို လက်သီးနဲ့ထိုးပြီး တိုက်ပိတ်ခဲ့တာလို့ ဆိုပါတယ်။

သားအကြီးဖြစ်တဲ့ ရဲတပ်သား သူရိန်လင်းက ရဲလုပ်သက် ၇ နှစ်နဲ့ သားအငယ်ရဲဒုတပ်ကြပ် တာရာလင်းက ရဲလုပ်သက် ၄ နှစ်ရှိနေဖြစ်ကာ ဒုရဲအုပ်စာမေးပွဲဖြေဆိုဖို့အတွက် ဖောင်တင်ထားသူလည်း ဖြစ်ပါတယ်။