ဆက်သွယ်ရေးဝန်ကြီးဌာနဟာ လစဉ် မိုဘိုင်းဖုန်းဆင်းကတ် ခွဲတမ်းနဲ့ ရောင်းချပေးရေး အစီအစဉ်အရ အောက်တိုဘာလအတွက် ဆင်းကဒ် စုစုပေါင်း ၃ သိန်း ၆ သောင်း ရောင်းချပေးမယ်လို့ ဒီနေ့ ထုတ်ပြန်ကြေညာပါတယ်။

ကျပ်ငွေ ၁၅၀၀ နဲ့ ရောင်းချပေမယ့် ဆင်းကတ်တွေထဲမှာ ရိုးရိုး ဂျီအက်စ်အမ် ဆင်းကတ် ၂ သိန်း ၅ သောင်း ၈ ထောင် နဲ့ 3G ဂျီအက်စ်အမ် ဆင်းကတ် ၁ သိန်း ၂ ထောင် ပါဝင်ပြီး စီဒီအမ်အေ ဆင်းကတ်တွေတော့ ပါဝင်ခြင်း မရှိတော့ပါဘူး။

အစိုးရက ခုလို လစဉ် ခွဲတမ်းနဲ့ ရောင်းချပေးနေတယ်ဆိုပေမယ့် အောက်ခြေ ရပ်ကွက်နဲ့ ကျေးရွာအဆင့် အာဏာပိုင်တချို့ရဲ့ မသမာလုပ်မှုတွေ ရှိနေလို့ အရေးယူရတဲ့ သတင်းတွေလည်း ထွက်ပေါ်နေပါတယ်။

အစိုးရက ကျပ် ၁၅၀၀ သတ်မှတ်ပြီး ခွဲတမ်းနဲ့ ရောင်းပေးနေတဲ့ ဆင်းကတ်အမျိုးအစား အားလုံးနီးပါး ကျပ် ၁ သိန်းကျော် ဈေးပေါက်နေပါတယ်။

မြန်မာ့ဆက်သွယ်ရေးဟာ လက်ရှိအချိန်ထိ မိုဘိုင်းဖုန်း ၆ သန်းနီးပါး တပ်ဆင်ထားနိုင်ပြီး၊ ဒါဟာ လူဦးရေရဲ့ ၁၀ ရာခိုင်နှုန်းပဲ ရှိသလို အာဆီယံ ၁၀ နိုင်ငံထဲမှာ ပြည်သူတွေ မိုဘိုင်းဖုန်း ကိုင်ဆောင်မှု ရာခိုင်နှုန်း အနိမ့်ဆုံး နိုင်ငံတနိုင်ငံ ဖြစ်နေပါသေးတယ်။