မွန်ပြည်နယ်၊ ကျိုက်ထိုမြို့နယ်ကို စစ်တပ်က ၂ ရက်ဆက် ဗုံးကြဲတိုက်ခိုက်လို့ အရပ်သား ၃ ​ယောက်နဲ့ ပြည်သူ့ကာကွယ်​ရေးတပ်ဖွဲ့ ရဲ​ဘော် ၃ ​ယောက် ထိမှန်ဒဏ်ရာရတယ်လို့ ​ဒေသခံ​တွေဆီက သိရပါတယ်။

ဇွန် ၁၈ ရက် ​နေ့လယ်ပိုင်းမှာ ကျိုက်ထိုမြို့နယ်၊ ရွာသစ်ရွာကို စစ်တပ်က လေကြောင်းကနေ ဗုံးကြဲတာကြောင့် အရပ်သား ၂ ယောက်နဲ့ ​တော်လှန်​​ရေးရဲဘော် ၃ ယောက် ဒဏ်ရာရပြီး ဒီ​နေ့ ဇွန် ၁၉ ရက် မနက်ပိုင်းမှာလည်း ဆင်တွင်းရွာအနီးကို ဗုံးကြဲခဲ့တာကြောင့် အရပ်သားတယောက် ဒဏ်ရာရတယ်လို့ သိရပါတယ်။

​ဒေသခံတ​ယောက်က “ဒီ​နေ့လည်းကြဲတယ်၊ မ​နေ့ကလည်း ဗုံးကြဲတယ်၊ ၂ ရက်ဆက်တိုက်​ပေါ့။ တိုက်ပွဲမဖြစ်ဘဲ ကြဲသွားတာ ရွာသားတ​ယောက် ထိသွားတယ်” လို့ DVB ကို​ ပြောပါတယ်။

ရွာသစ်ရွာကို ဗုံးနှစ်လုံးကြဲ တိုက်ခိုက်တာဖြစ်ပြီး ဆင်တွင်းရွာကိုလည်း ​ဗုံးနှစ်လုံးကြဲချ တိုက်ခိုက်တာလို့ ဆိုပါတယ်။

ဒဏ်ရာရ အမျိုးသား ၂ ယောက်၊ အမျိုးသမီးတယောက်တို့ကို ဆေးရုံပို့ထားရပြီး ဒေသခံ​တွေက​တော့ ​လေ​ကြောင်းအန္တရာယ်​ကြောင့် တိမ်း​ရှောင်​နေကြရတယ်လို့ သိရပါတယ်။