ထိန်းသိမ်းခံထားရတဲ့ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းအပါအဝင်   ဝန်ကြီးတွေရဲ့အခြေအနေကို ဒီကနေ့ ဖေဖော်ဝါရီ ၂ ရက်နေ့ မွန်းလွဲပိုင်းအထိ  မသိရသေးသလို မိသားစုနဲ့ အဆက်အသွယ်မရသေးဘူးလို့  ရန်ကုန်တိုင်းဒေသကြီး၊ လူမှုရေးဝန်ကြီး ဦးနိုင်ငံလင်းရဲ့  ဇနီးက   ဒီဗွီဘီကို ပြောပါတယ်။

လူမှုရေးဝန်ကြီး ဦးနိုင်ငံလင်းကို  ဖေဖော်ဝါရီ ၁ ရက်   မနက် ၅ နာရီဝန်းကျင်မှာ လာရောက်ခေါ်ဆောင်သွားတာလို့  သိရပါတယ်။

ဦးနိုင်ငံလင်းရဲ့  ဇနီးက “တာဝန်အရ ဆိုပြီး လာခေါ်သွားတာပါ။ အခုနေ့ခင်းပိုင်းအထိ  ဘာအခြေအနေမှ   မသိရသေးပါဘူး။  မနေ့က    လာခေါ်ကတည်းက    အဝတ်အစား၊ဆေး   လိုအပ်တာတွေ   တခါတည်း ထည့်ပေးလိုက်တော့   ခုထိတော့ သူ(ဦးနိုင်ငံလင်း)   ပြန်လာယူခိုင်းတာ မရှိပါဘူး​။ ဘာအဆက်အသွယ်မှလည်း  မရသေးပါဘူး။    တခြားလူကြီးပိုင်း ဝန်ကြီးချုပ်၊ဝန်ကြီးတွေ) အခြေအနေလည်း  မသိရသေးပါဘူး” လို့ ပြောပါတယ်။

ကနဦး သတင်းတွေအရ   ရန်ကုန်တိုင်းဒေသကြီးအစိုးရအဖွဲ့ဝင်   ဝန်ကြီးချုပ်နဲ့   လူမှုရေးဝန်ကြီး၊ ကရင်တိုင်းရင်းသားရေးရာ ဝန်ကြီးတို့    ထိန်းသိမ်းခံထားရပြီး   တခြားဝန်ကြီးတွေ အခြေအနေကတော့   မသိရသေးပါဘူး။