လာမယ့်အောက်တိုဘာ ၁၇ ကနေ ၂၀ ရက်နေ့အထိ ရန်ကုန်မြို့ ဦးဝိစာရလမ်းက တပ်မတော်ခန်းမမှာ မိုးရာသီ ကားအရောင်းပြပွဲကြီးတခု ကျင်းပပြုလုပ်မယ်လို့ smart business group တာဝန်ရှိသူတယောက်က ဒီဗွီဘီကို အတည်ပြုပြောဆိုပါတယ်။

အဲဒီပြပွဲမှာ ကားတင်သွင်းရောင်းချသူတွေရဲ့ ပြခန်းတွေ၊ ကားပစ္စည်းအရောင်းဆိုင်တွေ၊ ပြိုင်ကားတွေ၊ ကားတင်သွင်းတဲ့ ၀န်ဆောင်မှုလုပ်ဆောင်သူတွေရဲ့ ပြခန်းတွေ၊ စက်ယန္တရားတွေ၊ ချောဆီနဲ့ အင်ဂျင်ဝိုင်အရောင်းဆိုင်တွေပါ ပါဝင်မယ်လို့ သူက ရှင်းပြပါတယ်။

သမ္မတ ဦးသိန်းစိန်အစိုးရသစ် လက်ထက် လောလောဆယ် ရန်ကုန်မှာ ကားဟောင်းလဲတာအပါအ၀င် ကားအစီးရေ ၂ သိန်းလောက် တိုးပွားလာတယ်လို့ ရန်ကုန်တိုင်း ၀န်ကြီးချုပ် ဦးမြင့်ဆွေက ပြောကြားထားပြီး ကားဝယ်လိုအားကလည်း ပုံမှန်အတိုင်း ရှိနေဆဲလို့ ကားဝယ်ရောင်းသမားတွေဆီကနေ စုံစမ်းသိရပါတယ်။