ဖမ်းဆီးခံထားရတဲ့ SP မုန့်တိုက်ပိုင်ရှင် ဦးကျော်ဝင်းဟာ ကျန်းမာရေး မကောင်းတဲ့အတွက် အမြန်ဆုံးပြန်လွှတ်ပေးဖို့ TNLA အဖွဲ့ကို မိသားစုဝင်တွေက ဇန်နဝါရီ ၉ ရက်နေ့မှာ မေတ္တာရပ်ခံလိုက်ပါတယ်။

မန္တလေးတိုင်း၊ မိုးကုတ်မြို့နယ်၊ အောင်ချမ်းသာရပ်ကွက်မှာ နေထိုင်တဲ့ SP မုန့်တိုက်ပိုင်ရှင် ဦးကျော်ဝင်းကို ဒီဇင်ဘာ ၄ ရက်နေ့ မနက် ၈ နာရီခွဲအချိန်မှာ အရပ်ဝတ်ဝတ်ဆင်ထားတဲ့ တအာင်းပလောင်လက်နက်ကိုင်အဖွဲ့ TNLA အဖွဲ့ဝင်တွေက ဖမ်းဆီးသွားတာပါ။

TNLA က အသက်အန္တရာယ်မရှိစေရေး အာမခံထားပေမယ့် တစ်လကျော်ကြာချိန်အထိ ပြန်မလွတ်လာသေးတဲ့အတွက် မိသားစုဝင်တွေက စိုးရိမ်နေကြတယ်လို့ ညီဖြစ်သူ ဦးကျော်လင်းက ရန်ကုန်မြို့မှာ သတင်းစာရှင်းလင်းပွဲပြုလုပ် ပြောကြားခဲ့တာပါ။

“ကျနော့်အကိုက ကျန်းမာရေးမကောင်းဘူး။ အချိန်တိုအတွင်း ပြန်လွှတ်ပေးဖို့ မေတ္တာရပ်ခံချင်ပါတယ်” လို့ ဦးကျော်လင်းကပြောပါတယ်။

မိသားစုဝင်တွေက အခုဖြစ်စဉ်တွေအတွက် ဘယ်အဖွဲ့အစည်းကိုမှ အပြစ်မတင်လိုဘဲ ဦးကျော်ဝင်းကို ပြန်လွှတ်ပေးဖို့ပဲ မေတ္တာရပ်ခံကြပါတယ်။

ဦးကျော်ဝင်း အဖမ်းခံရတာနဲ့ ပတ်သက်ပြီး မိသားစုဝင်တွေက TNLA ပါဝင်တဲ့ ပြည်ထောင်စုနိုင်ငံရေး‌ ဆွေးနွေးညှိနှိုင်းရေးကော်မတီ FPNCC ဆီကိုလည်း အကူအညီတောင်းတဲ့ မေတ္တရပ်ခံစာပေးပို့ထားပါတယ်။

FPNCC ကို ဝ ပြည်သွေးစည်းညီညွတ်ရေးပါတီ UWSA တပ်ဖွဲ့က ဦးဆောင်နေတာဖြစ်ပြီး ဝ တပ်ဖွဲ့က အကူအညီပေးလိမ့်မယ်လို့လည်း ဦးကျော်ဝင်းရဲ့ မိသားစုဝင်တွေက မျှော်လင့်နေကြပါတယ်။

လက်ရှိအချိန်အထိ TNLA ဘက်က ဦးကျော်ဝင်းကို ဖမ်းဆီးထားတာနဲ့ပတ်သက်ပြီး ဆက်သွယ်တာမျိုး၊ ငွေကြေးတောင်းခံတာမျိုးမရှိသေးဘူးလို့ မိသားစုဝင်တွေက ပြောပါတယ်။