ရန်ကုန်တိုင်း မရမ်းကုန်းမြို့နယ်ရှိ ဗဟိုကာကွယ်ဆေး သိုလှောင်ရေးအအေးခန်းကနေ ဆေးဝါးတွေ ခိုးယူသူနဲ့ ရောင်းချပေးသူတွေ ဖမ်းဆီးမိခဲ့တယ်လို့ ရဲတပ်ဖွဲ့က ဒီနေ့မနက် ထုတ်ပြန်ပါတယ်။
မရမ်းကုန်းမြို့နယ်၊ (၃) ရပ်ကွက်၊ မင်းဓမ္မလမ်း၊ အမျိုးသားပြန်လည်သန်စွမ်းရေးဆေးရုံ၊ ဗဟိုကာကွယ်ဆေး သိုလှောင်ရေးအအေးခန်းအတွင်း ထားရှိတဲ့ ရေခဲသေတ္တာအမှတ် BC 2 အတွင်းမှ တိုင်းနဲ့ပြည်နယ်တွေကို မဖြန့်ဖြူးပေးရသေးတဲ့ စုစုပေါင်းတန်ဖိုး ၄၆,၀၈၁,၇၆၈ ကျပ်ရှိ သားအိမ်ခေါင်းကင်ဆာကာကွယ်ဆေးပုလင်း ၅,၈၁၀၊ အသည်းရောင် အသားဝါ B ကာကွယ်ဆေး အလုံး ၄၈၀၊ ပြင်းထန်အဆုတ်ရောင် ကာကွယ်ဆေးအလုံး ၇၀၀ တို့ ပျောက်ဆုံးခဲ့တာလို့ ဆိုပါတယ်။
ပျောက်ဆုံးမှုကို ပြည်သူ့ကျန်းမာရေးဦးစီးဌာန ဗဟိုကာကွယ်ဆေး အအေးခန်း ဦးစီးအရာရှိက ခိုးယူသွားသူအား စုံစမ်းဖော်ထုတ် အရေးယူပေးဖို့ မရမ်းကုန်းမြို့နယ်၊ ဘုရင့်နောင်နယ်မြေ ရဲစခန်းကို အမှုဖွင့်တိုင်တန်းခဲ့တာပါ။
ရန်ကုန်တိုင်းဒေသကြီးရဲတပ်ဖွဲ့ အထူးအမှုစစ်အဖွဲ့က ဆေးပစ္စည်းအရောင်းဆိုင်တွေမှာ လိုက်လံစုံစမ်းခဲ့ရာ ပန်းဘဲတန်းမြို့နယ်၊ ၄ ရပ်ကွက်၊ ၂၇/အပေါ်လမ်း၊ တိုက် ၂၀၂၊ (ပ) ထပ်နေ တင်အေး (ခ) မိုဟာမတ်အီလီယက်(ခ) တင်လှရဲ့ ဆေးဆိုင်မှာ ရောင်းချကြောင်း သိရတယ်လို့ ဆိုပါတယ်။
ဒီဇင်ဘာ ၂၉ ရက်နေ့မှာ အဲဒီဆေးဆိုင်ကို ဝင်ရောက်ရှာဖွေရာ Lot No – T013330 ပါ သားအိမ်ခေါင်းကင်ဆာ ကာကွယ်ဆေး ၆၄၃ လုံး သိမ်းဆည်းရမိခဲ့ပါတယ်။
တင်အေးကို စစ်မေးရာ သာကေတမြို့နယ်၊ ရှုခင်းသာအိမ်ယာနေ စိုးမြင့်(ခ)စလိုဒါဂျူး က လာရောက်ရောင်းချကြောင်း၊ စိုးမြင့်(ခ)စလိုဒါဂျူးကို ဖမ်းဆီးစစ်ဆေးရာ ဆိပ်ကြီးခနောင်တို မြို့နယ်၊ ပန်းပင်ချောင်ရပ်ကွက်၊ သစ်ခွမြိုင်လမ်း၊ အမှတ်(၅၇)နေ ဝဏ္ဏထွန်းက ရောင်းခိုင်းတာဖြစ်ကြောင်း စစ်ဆေးပေါ်ပေါက်ခဲ့ပါတယ်။
သူတို့ ၃ ဦးအား မေးမြန်းချက်အရ ဝဏ္ဏထွန်းက Lot No – T013330 ပါ သားအိမ်ခေါင်းကင်ဆာ ကာကွယ်ဆေး ၅၈၁၀ လုံး၊ အသည်းရောင် အသားဝါ B ကာကွယ်ဆေး၊ ပြင်းထန်အဆုတ်ရောင် ကာကွယ်ဆေးတို့အား ခိုးယူပြီး စိုးမြင့်(ခ)စလိုဒါဂျူး ကိုရောင်းချခိုင်းတာလို့ ဆိုပါတယ်။
စိုးမြင့်(ခ)စလိုဒါဂျူးက သားအိမ်ခေါင်းကင်ဆာ ကာကွယ်ဆေးတွေကို ဆေးဝါးရောင်းချသူ တင်အေး(ခ)မိုဟာမတ်အီလီယက်(ခ)တင်လှ၊ သန်းထွန်း(ခ)အီမရမ်း(ခ)စာကလေး၊ အောင်နေဦးနဲ့ စလင်း တို့ဆီ ရောင်းချခဲ့တယ်လို့ ထွက်ဆိုခဲ့ကြပါတယ်။
အမှုမှ ပျောက်ဆုံး သားအိမ်ခေါင်းကင်ဆာ ကာကွယ်ဆေး ၅၅၁၃ လုံး၊ အသည်းရောင်အသားဝါ B ကာကွယ်ဆေးအလုံး ၄၈၀၊ ပြင်းထန်အဆုတ်ရောင် ကာကွယ်ဆေး အလုံး ၇၀၀ ကို ပြန်လည်သိမ်းဆည်းရရှိပြီး ပြစ်မှုကျူးလွန်သူ ဝဏ္ဏထွန်းပါ ၆ ဦးကို ဥပဒေနဲ့အညီ အမြန်တရားစွဲတင်ပို့နိုင်ဖို့ ဆောင်ရွက်နေတယ်လို့ ထုတ်ပြန်ထားပါတယ်။
