ကယားပြည်နယ်လွှတ်တော်ဥက္ကဋ္ဌ ဦးလှထွေးကို ထောက်ခံဝန်ရံသူတွေက ရှားတောမြို့နယ်မှာ နိုဝင်ဘာ ၅ ရက်နေ့က မဲဆွယ်စည်းရုံးမှုတွေပြုလုပ်ခဲ့ပါတယ်။

ဦးလှထွေးဟာ ရှားတောမြို့နယ် ပြည်နယ်လွှတ်တော်မဲဆန္ဒ ၂  တသီးပုဂ္ဂလအနေနဲ့ ဝင်ရောက်ယှဉ်ပြိုင်တာဖြစ်ပြီး အန်အယ်လ်ဒီပါတီက ဒေါ်နော်ဆဲဂေထူး၊ KySDP ကစိုင်းအုန်းမြင့်၊ ကြံ့ခိုင်ဖွံ့ဖြိုးရေးပါတီက ဒေါ်ခင်မာဝင်း၊ UBP ပါတီက ဦးအောင်စိုးနဲ့ NDF ပါတီက ဦးမောင်မောင်သန့်တို့နဲ့ ယှဉ်ပြိုင်ရမှာဖြစ်ပါတယ်။

ဦးလှထွေးဟာ  ၂၀၁၅ ရွေးကောက်ပွဲတုန်းက အဆိုပါ မဲဆန္ဒနယ်မြေမှာပဲ အန်အယ်လ်ဒီပါတီကိုယ်စားလှယ်အနေနဲ့ အနိုင်ရခဲ့ပြီး လွှတ်တော်ဥက္ကဋ္ဌ အဖြစ်ရွေးချယ်ခံခဲ့ရတာဖြစ်ပါတယ်။

ပြည်နယ်ဝန်ကြီးချုပ်ကို အယုံအကြည်မရှိကြောင်း ကယားပြည်နယ်လွှတ်တော်မှာ စက်တင်ဘာ ၁ ရက်က ထောက်ခံမဲအများစုနဲ့ စွပ်စွဲပြစ်တင်  မဲခွဲဆုံးဖြတ်ပြီးနောက် စက်တင်ဘာ ၃ ရက်နေ့မှာ သမ္မတက ဦးအယ်လ်ဖောင်းရှိုကို ဝန်ကြီးချုပ်ရာထူးကနေ  ရပ်ဆိုင်းခဲ့ပါတယ်။ ဒီပေါ်မှာ ပြည်နယ်လူထုတွေက ဦးလှထွေးကို ဝေဖန်မှုတွေရှိနေသလို ထောက်ခံသူတွေလည်း ရှိခဲ့ပါတယ်။

ကယားပြည်နယ်မှာ တစ်သီးပုဂ္ဂလ လွှတ်တော် ကိုယ်စားလှယ်လောင်း ၁၃ ဦးအပါအဝင်  နိုင်ငံရေးပါတီ ၁၂ ပါတီမှ ကိုယ်စားလှယ်လောင်း စုစုပေါင်း ၂၃၂ ဦး ၂၀၂၀ ရွေးကောက်ပွဲမှာ ဝင်ရောက် ယှဉ်ပြိုင်ကြမှာဖြစ်တယ်လို့ သိရပါတယ်။

ဓာတ်ပုံ- SEIN WIN