ဘင်္ဂလားဒေ့ရှ်နိုင်ငံဘက် ကုန်ပစ္စည်းတွေ တရားမဝင်တင်ပို့တဲ့ စက်လှေမောင်းသူ အပါအဝင် ၉ ဦးကို အောက်တိုဘာ ၁၈ ရက်နေ့ မနက်ပိုင်းက မောင်တောမြို့နယ်တရားရုံးမှာ ချုပ်ရမန်ရယူထားတယ်လို့ သိရပါတယ်။
မောင်တောမြို့နယ်တရားရုံး တာဝန်ရှိသူတဦးက “ဒီနေ့ မကျည်းချောင်း နယ်ခြားစောင့်စခန်းက ၉ ဦးကို ရမန်ရယူတယ်။ သဘာဝဘေးအန္တရာယ်ဆိုင်ရာ စီမံခန့်ခွဲရေးဥပဒေ ပုဒ်မနဲ့ ရမန်ရယူထားတယ်” လို့ ပြောပါတယ်။
အဲဒီစက်လှေဟာ ရခိုင်ပြည်နယ် စစ်တွေမြို့ကနေ ဘင်္ဂလားဒေ့ရှ်နိုင်ငံကို ငါးခြောက်တွေ သွားရောက်ပို့ဆောင်တာဖြစ်ပြီး အောက်တိုဘာ ၁၅ ရက်နေ့ မနက် ၈ နာရီလောက်က မောင်တောမြို့ ဂေါ်ဒူသာရ ချောင်းဝကင်းစခန်းရဲ့ ၁ မိုင်ခန့်အကွာမှာ သဲသောင်ခုံကို တိုက်မိကာ လှေဝမ်းဗိုက်ပေါက် နစ်မြုပ်သွားခဲ့တာကြောင့် လှေမောင်းအပါအဝင် လှေပေါ်ပါလာသူ ၉ ဦးကို ဂေါ်ဂူသာရနယ်မြေစခန်းက ကယ်ဆယ်ဖမ်းဆီးမိခဲ့တာလို့ သိရပါတယ်။
လှေပေါ်မှာ ငါးခြောက်အိတ် ၁၁၅၀ အိတ်တင်ဆောင်ထားတယ်လို့ မကျည်းချောင်း ရဲစခန်းမှူး ရဲအုပ်အောင်မျိုးလွင်က DVB ကို ပြောပါတယ်။
“မော်ဘုတ်သမား ၉ ဦးကို မကျည်းချောင်းနယ်မြေစခန်းက ကယ်ဆယ်ထားနိုင်ခဲ့တယ်။ သူတို့ကို မကျည်းချောင်းနယ်မြေစခန်းမှာပဲ (ပ)၃/၂၀၂၀ သဘာဝဘေးအန္တရယ်ဆိုင်ရာစီမံခန့်ခွဲရေးမှု ဥပဒေပုဒ်မ ၂၅/၃၀(က) နဲ့ အမှုဖွင့်လှစ်လိုက်တယ်။”
အလားတူ အောက်တိုဘာ ၁၄ ရက်နေ့ နေ့လယ် ၁ နာရီလောက်ကလည်း ဘင်္ဂလားဒေ့ရှ် ရေပိုင်နက်ထဲ တရားမဝင်သွားရောက်တဲ့ ကုန်ပစ္စည်းမျိုးစုံ တင်ဆောင်ထားတဲ့ စက်လှေ ၁ စီးကို မောင်တောမြို့အမှတ် (၁) ရေအထူးတပ်ဖွဲ့က နတ်မြစ်အတွင်း နွားမြက်ထောင် ချောင်းဝ ၁ မိုင်ခန့်အကွာမှာ ဖမ်းမိခဲ့ပြီး လှေပေါ်မှာ လူ ၆ ဦး လိုက်ပါလာတယ်လို့ သိရပါတယ်။
သတင်း၊ ဓာတ်ပုံ - လင်းလက်
