မနေ့ညက ထုတ်ပြန်ခဲ့တဲ့ ကိုဗစ်-၁၉ ပိုးတွေ့လူနာအသစ် ၁,၃၄၄ ယောက်ထဲမှာ ရန်ကုန်တိုင်း၊ ကြည့်မြင်တိုင်မြို့နယ်က ၁၇၀ ယောက် ပါဝင်နေတယ်လို့ ကျန်းမာရေးနှင့် အားကစားဝန်ကြီးဌာနရဲ့ ဒီကနေ့ညနေ ၅ နာရီအချိန် ထုတ်ပြန်ချက်အရ သိရပါတယ်။
ကိုဗစ်-၁၉ ပိုးတွေ့လူနာတွေထဲမှာ ရန်ကုန်တိုင်းက ၁,၀၁၄ ယောက်နဲ့ အများဆုံး ဖြစ်ပါတယ်။ ရန်ကုန်တိုင်းမြို့နယ်တွေထဲက ကြည့်မြင်တိုင်မြို့နယ်မှာ ၁၇၀ ယောက် ၊ အင်းစိန်မြို့နယ်မှာ ၁၁၁ ယောက်၊ မင်္ဂလာဒုံမြို့နယ်မှာ ၇၉ ယောက်စီနဲ့ အများဆုံးဖြစ်ပြီး စုစုပေါင်း မြို့နယ် ၄၀ မြို့နယ် ပါဝင်နေတာ ဖြစ်ပါတယ်။
ကျန်တဲ့ တိုင်းနဲ့ ပြည်နယ်တွေအလိုက် ကိုဗစ်-၁၉ ရောဂါပိုးတွေ့ရှိမှုအနေနဲ့ ပဲခူးတိုင်းမြို့နယ် ၈ ခုမှာ ၂၉ ယောက်၊ မန္တလေးတိုင်းမြို့နယ် ၁၁ ခုမှာ ၄၄ ယောက်၊ မွန် ပြည်နယ်မြို့နယ် ၂ ခုမှာ ၅ ယောက်၊ မကွေးတိုင်းမြို့နယ် ၉ ခုမှာ ၄၁ ယောက်၊ ဧရာဝတီတိုင်းမြို့နယ် ၉ ခုမှာ ၄၀ ယောက်၊ ရခိုင်ပြည်နယ်မြို့နယ် ၁၃ ခုမှာ ၁၃၆ ယောက်၊ စစ်ကိုင်းတိုင်းမြို့နယ် ၂ ခုမှာ ၁၅ ယောက်၊ ကရင်ပြည်နယ်မြို့နယ် ၂ ခုမှာ ၃ ယောက်၊ နေပြည်တော်မြို့နယ် ၁ ခုမှာ ၁ ယောက်၊ ချင်းပြည်နယ်မြို့နယ် ၂ ခုမှာ ၂ ယောက်၊ ရှမ်းပြည်နယ်(မြောက်ပိုင်း)မြို့နယ် ၁ ခုမှာ ၁ ယောက်၊ တနင်္သာရီတိုင်းမြို့နယ် ၃ ခုမှာ ၄ ယောက်၊ ကချင်ပြည်နယ်မြို့နယ် ၄ ခုမှာ ၉ ယောက် အသီးသီး တွေ့ရှိခဲ့ရတာ ဖြစ်ပါတယ်။
အဆိုပါအတည်ပြုလူနာ ၁,၃၄၄ ယောက်ထဲမှာ အနံ့မရရှိသူ ၁၆၉ ယောက်ပါဝင် နေတယ်လို့လည်း ကျန်းမာရေးဌာန ထုတ်ပြန်ချက်ထဲမှာ ဖော်ပြပါတယ်။
မြန်မာနိုင်ငံမှာ အောက်တိုဘာ ၁၂ ရက်နေ့ည ၈ နာရီအထိ ကိုဗစ်-၁၉ အတည်ပြုလူနာ ၂၉,၃၁၄ ယောက်၊ သေဆုံးသူ ၆၆၄ ယောက်နဲ့ ဆေးရုံဆင်းခွင့်ရသူ ၉၇၄၂ ယောက်ရှိပြီလို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။
ကမ္ဘာတဝန်းမှာတော့ လက်ရှိအချိန်ထိ ကိုဗစ်-၁၉ အတည်ပြုလူနာ ၃၈ သန်းကျော်၊ သေဆုံးသူ ၁ သန်း ၈ သောင်းကျော်နဲ့ ရောဂါသက်သာပျောက်ကင်းသူ ၂၈ ဒသမ ၆ သန်း ကျော် ရှိ နေပြီ ဖြစ်ပါတယ်။
