ကိုးကန့်ဒေသတွင် မဲရုံတာဝန်ကျ ဆရာဆရာမ ၂၀၀ ခန့် ကွာရန်တင်းဝင်
DVB
·
October 7, 2020
ကိုးကန့်ကိုယ်ပိုင်အုပ်ချုပ်ခွင့်ရဒေသမှာ မဲရုံတာဝန်ကျတဲ့ ဆရာဆရာမ ၂၀၀ လောက် ကွာရန်တင်းဝင်နေတယ်လို့ လောက်ကိုင်မြို့နယ်အုပ်ချုပ်ရေးမှူး ဦးငွေဒိုးက ပြောပါတယ်။
ကွာရန်တင်းဝင်နေတဲ့ဆရာဆရာမတွေဟာ ကျောင်းပိတ်ချိန်မှာ သူတို့ဇာတိဒေသတွေကို ပြန်နေကြပြီး မဲရုံတာဝန်ထမ်းဆောင်ဖို့ရှိတာကြောင့် ပြန်လာကြရပြီး ကွာရင်တင်း ၂၁ ရက်ဝင်နေ ကြတာလို့ ဆိုပါတယ်။
“သူတို့ရဲ့ခရီးစရိတ်ကို ကိုးကန့်ကိုယ်ပိုင်အုပ်ချုပ်ခွင့်ရဒေသဦးစီးက ထောက်ပံ့မှာဖြစ်ပြီး လက်ရှိကွာရန်တင်းဝင်ချိန်မှာ စားဖို့သောက်ဖို့ကိုတော့ ကျနော်တို့ကော အလှူရှင်တွေ လာလှူပေး နေကြတာရောရှိလို့ အဆင်ပြေ နေပါသေးတယ်” လို့ ဦးငွေဒိုးက ပြောပါတယ်။
အဝေးကပြန်ရောက်လာသူ ဆရာဆရာမတွေဟာ လောက်ကိုင်မြို့နယ်မဲဆန္ဒနယ်မြေ အတွက် ၁၀၂ ယောက်နဲ့ ကုန်းကြမ်းမြို့နယ်အတွက် ၉၆ ယောက် ကွာရန်တင်းဝင်နေကြပါတယ်။
ကွာရန်တင်းဝင်ပြီးနောက် ရွေးကောက်ပွဲကော်မရှင်က ဆရာဆရာမတွေကို သင်တန်းပေးဖို့ရှိပြီး ရွေးကောက်ပွဲ လုံခြုံရေးအတွက်လည်း အထူးရဲ ၂၀၀ လောက်ကို လေ့ကျင့် သင်တန်းပေးနေတယ်လို့ သိရပါတယ်။
သတင်း- နန်းစပယ်
