စင်ကာပူရောက်မြန်မာများ ကြိုတင်ဆန္ဒမဲ စပေး
DVB
·
October 1, 2020
၂၀၂၀ အထွေထွေရွေးကောက်ပွဲအတွက် စင်ကာပူနိုင်ငံရောက်မြန်မာတွေ ဒီကနေ့ အောက်တိုဘာ ၁ ရက် ဒေသစံတော်ချိန် မနက် ၉ နာရီက စတင်ပြီး မြန်မာသံရုံးမှာ ကြိုတင်ဆန္ဒမဲပေးနေကြပါတယ်။
ကိုဗစ်-၁၉ ကပ်ဘေးကာလအတွင်း မဲပေးရတာဖြစ်တဲ့အတွက် စင်ကာပူအာဏာပိုင်တွေက စည်းကမ်းတွေကို တင်းကျပ်ထားပြီး ကြိုတင်မဲပေးမယ့်သူတွေဟာ မနက်အစောပိုင်းထဲက မြန်မာသံရုံးရှိရာ စိန့်မာတင်လမ်း တစ်ဖက်တချက်ဆီမှာ Social distancing နဲ့ အညီ ခပ်ခွာခွာ တန်းစီရတာဖြစ်ပါတယ်။
အောက်တိုဘာ ၁ ရက်နေ့ ကြိုတင်မဲပေးခြင်း ပထမအသုတ်ကိုတော့ ဒေသစံတော်ချိန် မနက် ၉ နာရီမှ ၉ နာရီ ၄၅ မိနစ်အထိဆောင်ရွက်ခဲ့ပြီး မဲဆန္ဒရှင် အယောက် ၂၀၀ လောက် လာရောက်မဲပေးခဲ့တယ်လို့သိရပါတယ်။
စင်ကာပူရှိ မြန်မာသံရုံးမှာ ပုံစံ ၁၅ နဲ့ ကြိုတင်မဲပေးခွင့် လာတင်ထားတဲ့သူ ၃၄၆၀၀ ၀န်းကျင် ရှိပါတယ်။ ကော်မရှင်က စိစစ်ပြီး ပြန်ပို့လာတဲ့ ကြိုတင်မဲပေးခွင့် ရှိသူစာရင်းက ၃၄၀၀၀ ၀န်းကျင် ရှိပြီး ၂၀၀၀ ၀န်းကျင်ကတော့ စာရင်းပါမလာခဲ့ပါဘူး။
သံရုံးအနေနဲ့ ကြိုတင်မဲပေးခွင့် ရှိသူစာရင်းထဲ မပါသူတွေရဲ့ အချက်အလက်တွေကို စုစည်းပြီး ရွေးကောက်ပွဲကော်မရှင်ထံ ပေးဖို့ စီစဉ်ပေးနေတယ်လို့ စင်ကာပူမှာ မဲပေးခွင့်ရရေး ကူညီပေးနေသူတစ်ဦးက ပြောပါတယ်။
စင်ကာပူမှာ ကြိုတင်ဆန္ဒမဲကို အောက်တိုဘာ ၁ ရက်မှ ၁၈ ရက်အထိ ပေးလို့ရမှာပါ။ ဒါပေမဲ့ မဲပေးမယ့်ရက်ကို ကြိုတင်ပြီး လျှောက်ထားမှဖြစ်တယ်လို့ မြန်မာသံရုံးက ထုတ်ပြန်ကြေညာ ထားပါတယ်။
သတင်း- ဖြိုးသက်ပိုင်မြင့်/ ထက်ဝေအောင်
