စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ်မှာ ကိုဗစ်-၁၉ အတည်ပြုလူနာ ၂ ယောက် ပထမဆုံး တွေ့ရှိခဲ့တယ်လို့ ကနီပြည်သူ့ကျန်းမာရေးဦးစီးဌာနမှ ဒေါက်တာဝေမာနွယ်က ပြောပါတယ်။

အသက် ၂၅ နှစ်နဲ့ ၁၉ နှစ်အရွယ် အမျိုးသား ၂ ယောက်ဟာ ပိုးတွေ့ ဖောင်းပြင်လူနာနဲ့အတူ စက်တင်ဘာ ၁၉ ရက်နေ့က ရန်ကုန်ကနေ ကားနဲ့ အတူပြန်လာခဲ့တာကြောင့် ဆင်အိုကျေးရွာမှာ Quarantine ထားရှိကာ ဓာတ်ခွဲနမူနာစစ်ဆေးရာမှ ရောဂါပိုးတွေ့ခဲ့တာပါ။

ဒေါက်တာဝေမာနွယ်က “ဆင်အိုရွာ စာသင်‌ကျောင်းမှာ CBFQ ထားရှိတဲ့လူနာပါ။ စက်တင်ဘာ ၂၅ ရက်နေ့ အာခေါင်တို့ဖတ်၊ နှာခေါင်တို့ဖတ်ယူပြီး မန္တလေးဆေးရုံပို့ထားတဲ့ ကွာရန်တင်းဝင်နေသူ နှစ်ဦးထဲကနေ ကိုဗစ်-၁၉ ရောဂါပိုး ပထမဆုံးတွေ့ရှိတယ်” လို့  ပြောပါတယ်။ 

ပိုးတွေ့လူနာ ၂ ယောက်ကို ဆေးကုသမှုခံယူဖို့ ကနီပြည်သူ့ဆေးရုံကို ပို့ဆောင်ခဲ့တယ်လို့ သိရပါတယ်။ 

ပိုးတွေ့လူနာ ၂ ယောက်ဟာ ရန်ကုန်က ပြန်လာပြီးနောက် Quarantine ဝင်နေတာကြောင့် တခြားသူတွေနဲ့တော့ ထိတွေ့မှုမရှိခဲ့ဘူးလို့ ဆိုပါတယ်။

ကနီမြို့နယ်မှာ Facility Quarantine နဲ့ Hotel Quarantine ဝင်နေသူ ၄၇၃ ဦးရှိတယ်လို့ ကနီမြို့နယ် မြို့နယ်အုပ်ချုပ်ရေးမှူး ဦးသိုက်စိုးထွန်းကပြောပါတယ်။ 

သတင်း - ကျော်မင်းသန့်