စစ်ကိုင်းတိုင်းဒေသကြီး ရွှေဘိုမှာ ညမထွက်ရအမိန့်ဖောက်ဖျက်သူ ၃ ဦးကို စက်တင်ဘာ ၂၁ ရက်က အလုပ်နဲ့ထောင်ဒဏ် ၃ လစီချမှတ်လိုက်တယ်လို့ ရွှေဘိုမြို့မစခန်းမှူး ဒုရဲမှူး သိန်းဆန်းဦးက ပြောပါတယ်။

မြို့နယ် အထွေထွေအုပ်ချုပ်ရေးဦးစီးဌာနက ထုတ်ပြန်ထားတဲ့ ည ၁၂ နာရီမှ နောက်နေ့ မနက် ၄ နာရီအတွင်း ညမထွက်ရအမိန့်ကို ဖောက်ဖျက်ပြီး စက်တင်ဘာလ ၂၀ ရက်နေ့ညပိုင်းက ရွှေဘိုမြို့ အမှတ် ၃ ရပ်ကွက် ရန်ကြီးအောင်လမ်းအနီး ရထားသံလမ်းမှာ အရက်ဝိုင်းဖွဲ့ သောက်နေသူ ၃ ဦးကို ဖမ်းဆီးအရေးယူခဲ့တာပါ။

ညမထွက်ရအမိန့်ဖောက်ဖျက်ပြီး အရက်ဝိုင်းဖွဲ့သောက်တဲ့ မိုးမင်းဦး (၁၉ နှစ်)၊ အောင်ဟိန်းခန့် (၂၂ နှစ်)နဲ့ ဝေလင်းဦး (၁၉ နှစ်) တို့​ကို မြို့နယ်အုပ်ချုပ်ရေးမှူး ဦးသောင်းဟိန်းက တရားဥပဒေအရ အရေးယူပေးဖို့ တိုင်ကြားတဲ့အတွက် ရွှေဘိုမြို့မရဲစခန်းက မျိုးမင်းဦးပါသုံးဦးကို အမှုဖွင့်ပြီး တရားရုံးသို့ ဦးတိုက်လျှောက်ထားခဲ့တာ ဖြစ်ပါတယ်။

ရွှေဘိုမြို့နယ် တရားသူကြီးက ဒီအမှုကိုလက်ခံစစ်ဆေးခဲ့ပြီး မျိုးမင်းဦး အပါအဝင်  သုံးဦးကို ရာဇသတ်ကြီးပုဒ်မ-၁၈၈ အရ အလုပ်နဲ့ ထောင်ဒဏ် ၃ လ စီချမှတ်လိုက်တာဖြစ်ပါတယ်။

ရွှေဘိုမှာ စက်တင်ဘာလ ၁၃ ရက်ကလည်း ညမထွက်ရအမိန့်မလိုက်နာသူ ၂၀ ဦးကို ဖမ်းဆီး အရေးယူခဲ့ပြီး ရာဇသတ်ကြီးပုဒ်မ ၁၈၈ နဲ့ တရားရုံးသို့ ဦးတိုက်လျှောက်ထား တရားစွဲဆိုခဲ့ကြောင်း အထွေထွေအုပ်ချုပ်ရေးဦးစီးဌာနကနေ သိရပါတယ်။

ရွှေဘိုမြို့မှာ အခုတပတ်အတွင်းနှာခေါင်းစည်း Mask မတပ်သူ ၃၅ ဦးကို အရေးယူခဲ့တယ်လို့လည်း စည်ပင်သာယာရေးကော်မတီ တာဝန်ရှိသူတွေက ပြောပါတယ်။

သတင်း - ချိုသဲကြည်