News Watch (စောင့်ကြည့်)သတင်းဂျာနယ်တိုက်က သတင်းထောက်တဦးမှာ ကိုဗစ်-၁၉ ရောဂါပိုးတွေ့ရှိခဲ့ရတာကြောင့် ရုံးလုပ်ငန်းတွေ ယာယီရပ်ဆိုင်းကာ ဂျာနယ်ထုတ်ဝေမှုကိုလည်း သီတင်း ၂ ပတ်ရပ်နားသွားမယ်လို့ သိရပါတယ်။
စက်တင်ဘာ ၁၄ ရက်က အဲဒီသတင်းထောက်မှာ ကိုဗစ်-၁၉ ရောဂါပိုးကူးစက်ခံထားရ ကြောင်း အတည်ပြုနိုင်ခဲ့လို့ စက်တင်ဘာ ၁၅ ရက်ကစပြီး ရုံးလုပ်ငန်းတွေကို ယာယီ ရပ်နားထား ကြောင်း သတင်းဂျာနယ်တိုက်ရဲ့ဖေ့စ်ဘွတ်ခ်ကတဆင့် အသိပေး ကြေညာထားပါတယ်။
လတ်တလောမှာတော့ အပတ်စဉ်သောကြာနေ့တိုင်းထုတ်ဝေနေကျ News Watch (စောင့်ကြည့်)သတင်းဂျာနယ်ကို သီတင်းပတ် ၂ ပတ်လောက်ရပ်နားထားမှာဖြစ်ကြောင်းနဲ့ ပြန်လည် ထွက်ရှိမယ့်ရက်ကိုတော့ ကြိုတင်အသိပေးကြေညာပေးမယ်လို့ ဆိုပါတယ်။
၂၀၁၉ ခုနှစ်ကုန်ပိုင်းမှာ တရုတ်နိုင်ငံအလယ်ပိုင်း ဝူဟန်မြို့က စတင်ခဲ့တဲ့ ကိုဗစ်-၁၉ ရောဂါ ကူးစက်ပျံ့နှံ့မှုဟာ လတ်တလောအချိန်ထိ တရိပ်ရိပ် မြင့်တက်နေဆဲပါ။
ကိုဗစ်-၁၉ ဒုတိယလှိုင်းကာလကူးစက်မှုတွေ မြင့်တက်နေတဲ့ မြန်မာနိုင်ငံမှာတော့ ပထမဆုံး သော ကိုဗစ်-၁၉ အတည်ပြုလူနာကို မတ်လ ၂၃ ရက်မှာ စတွေ့ခဲ့ပါတယ်။
ပြီးခဲ့တဲ့လက ရခိုင်ပြည်နယ်က တကျော့ပြန်ကူး စက်မှုတွေရှိလာခဲ့ပြီး ရောဂါကူးစက်ခံရ သူအရေအတွက်ဟာ သိသိသာသာမြင့်တက်လာခဲ့လို့ ဒီနေ့မနက်အထိ မြန်မာနိုင်ငံမှာ ကိုဗစ်-၁၉ အတည်ပြုလူနာပေါင်း ၄,၂၉၉ ဦးနဲ့ သေဆုံးသူပေါင်း ၆၁ ဦး ရှိ လာပါတယ်။
