အခုလက်ရှိဖွင့်ထားတဲ့ မြန်မာတနိုင်ငံလုံးက အခြေခံပညာစာသင်ကျောင်းပေါင်း ၆၅၀၀ ကျော်ကို ဩဂုတ် ၂၇ ရက်ကစပြီး ယာယီပိတ်လိုက်တယ်လို့ အခြေခံပညာဦးစီးဌာန ဒုတိယ ညွှန်ကြားရေးမှူးချုပ် က ပြောပါတယ်။
မြန်မာတနိုင်ငံလုံးမှာ အခြေခံပညာအထက်တန်းကျောင်းပေါင်း ၇၁၇၃ ကျောင်းရှိတဲ့အထဲက အေ အဆင့်ရတဲ့ ကျောင်း ၆၅၂၂ ကျောင်းကို ပြန်လည် ဖွင့်ခွင့်ပြုထားရာကနေ ခုရက်ပိုင်းအတွင်း ကိုဗစ်-၁၉ ရောဂါ ဖြစ်ပွားမှုနှုန်း အရှိန်မြင့်နေတဲ့ အခြေအနေမှာ ကျောင်းတွေပြန်ပိတ်လိုက်တာပါ။
ကိုဗစ်-၁၉ ဗဟိုကော်မတီရဲ့လမ်းညွှန်ချက်ကြောင့် ပြည်နယ်တိုင်းမှာရှိတဲ့ ကျောင်းတွေကို အကြောင်းကြားထားပြီး ဩဂုတ် ၂၇ ရက်နေ့ကစပြီး ဖွင့်လှစ်ထားတဲ့ကျောင်းအားလုံးကို ရက် အကန့်အသတ်မရှိ ယာယီပိတ်သိမ်းမှာဖြစ်တယ်လို့ အခြေခံပညာဦးစီးဌာန ဒုတိယ ညွှန်ကြားရေးမှူးချုပ် ဒေါက်တာတင်မောင်ဝင်းက ပြောပါတယ်။
မီဒီယာတချို့မှာ ပျံ့နှံ့နေတဲ့ ဒဂုံ ၁ ကျောင်းက ဆယ်တန်း ကျောင်းသားကိစ္စနဲ့ပတ်သက်လို့ အဆိုပါကျောင်းသားဟာ အုပ်စု C မှာ ပါတာကြောင့် သီတင်းနှစ်ပတ်မှာမှ ကလေးတိုင်းက ၃ ရက်ပဲ ကျောင်းတက်ရတာဖြစ်ပြီး လက်ရှိမှာတော့ ကလေးကအိမ်မှာပဲ home stay နေကာ စာလုပ်နေတယ်လို့ ကျောင်းအုပ်ဆရာကြီး ဦးသန်းနိုင်ကပြောပါတယ်။
မြန်မာတနိုင်ငံလုံးကအခြေခံပညာ အတက်တန်းကျောင်းတွေကို ဇူလိုင် ၂၁ ရက်နေ့က စတင်ဖွင့်လှစ်ခဲ့တာဖြစ်ပြီး ဖွင့်တာဟာအခုဆိုရင် တလကျော် လောက်ပဲရှိပါတယ်။
အခြေခံပညာအစိုးရ အထက်တန်းကျောင်း၊ ဘုန်းတော်ကြီးပညာ သင်ကျောင်းနဲ့ ကိုယ်ပိုင်ကျောင်းအားလုံးကို ယာယီ အကန့် အသတ်မရှိပိတ်သွားမှာဖြစ်ပြီး သက်ဆိုင်ရာ ကိုဗစ်ကော်မတီရဲ့လမ်းညွှန်ချက်အတိုင်း ဆက်လက်လုပ်ဆောင်သွားမှာဖြစ်တယ်လို့ဆိုပါတယ်။
သတင်း - ခင်ငြိမ်းချမ်း
