မွန်ပြည်နယ်အတွင်း ပထမဆုံးဖြစ်လာမယ့် မွန်ဘာသာစကားသင်တန်းကျောင်း Mon Language Class ကို လာမယ့် ဩဂုတ်လကစလို့ ရေးမြို့မှာ စတင်ဖွင့်လှစ်ဖို့ရှိနေပါတယ်။

ခုလ ၂၅ ရက်နေ့မှ ၂၇ ရက်နေ့အထိ Mon National Education Center - MNEC ရဲ့ အကူအညီနဲ့ ရေးမြို့မှာ မွန်ဘာသာစကားသင်ကြားရေးဆိုင်ရာ ဆရာဖြစ်သင်တန်းကို သင်တန်းသား ၁၇ ဦးနဲ့ သင်ကြားခဲ့ပြီး ကျန်းမာရေးဝန်ကြီးဌာနရဲ့ လမ်းညွှန်ချက်တွေအတိုင်း ဖွင့်လှစ်ဖို့ စီစဉ်နေတာဖြစ်ပါတယ်။

အစီအစဉ်စတင်အကောင်အထည်ဖော်သူ Mon Language Class ဖြစ်မြောက်ရေး ကော်မတီအတွင်းရေးမှူး ကိုအောင်ကိုကိုဦးက ''ရေးမှာ မွန်လူမျိုးတွေက အများဆုံးနေကြပေမယ့် လူမှုပတ်ဝန်းကျင်အသိုင်းအဝန်းကွာခြားတာကိုမူတည်ပြီးတော့ကာမွန်စကားနဲ့စာပေတတ်မြောက်မှုက  ၅၀ ရာနှုန်းကျော်လောက်က နည်းလာပါတယ်။ လူမျိုးတစ်မျိုး ခိုင်မာစွာရပ်တည်ဖို့က စာပေက အရေးကြီးဆုံးဖြစ်လို့ ခုလိုအစီအစဉ်ကို စပြီး အကောင်အထည်ဖော်ဖြစ်တာပါ။''လို့ ဒီဗွီဘီကို ပြောပါတယ်။

Mon National Education Center - MNEC အနေနဲ့ သင်ရိုးညွှန်းတမ်းတွေရေးဆွဲပေးတာအပြင် နည်းပညာပိုင်း ကူညီပေးသွားမှာဖြစ်ကြောင်းနဲ့ မွန်ပြည်နယ်အတွင်း ပထမဆုံးဖွင့်လှစ်တဲ့ အတန်းတစ်ခုဖြစ်ကြောင်းလည်း MNEC အစီအစဉ်မန်နေဂျာ မင်းအောင်ဇေက ပြောပါတယ်။

''class ကို မူပိုင်တစ်ခုအနေနဲ့ ရှိနိုင်အောင် လုပ်သွားမယ်၊ အမြန်ဆုံးအလွယ်တကူတတ်မြောက်ဖို့ သင်ရိုးညွှန်းတမ်းတွေ ရေးဆွဲပေးသွား ဖို့ရှိပါတယ်။ ဒီလို class က ပထမဆုံးဖွင့်လှစ်တာပါပဲ '' လို့ ဒီဗွီဘီကို ပြောပါတယ်။

Mon Language Class ကို မွန်စကားနဲ့ စာပေကို စိတ်ပါဝင်စားသူမည်သူမဆို အခမဲ့ တက်ရောက်နိုင်မှာဖြစ်တယ်လို့လည်း သိရှိရပါတယ်။

သတင်း/ဓါတ်ပုံ - ဝင်းနိုင်သက်