စစ်ကိုင်းမြို့က ကိုဗစ်-၁၉ အတည်ပြုလူနာဟာ ၈ ကြိမ်မြောက် စစ်ဆေးပြီးချိန်မှာ ပိုးမတွေ့တော့လို့ ဆေးရုံက ဆင်းခွင့်ရပြီး ဟိုတယ် Quarantine အဖြစ် ထပ်မံစောင့်ကြည့်မယ်လို့ စစ်ကိုင်းမြို့ ကုတင် ၂၀၀ ဆံ့ ဆေးရုံအုပ်ကြီးက ပြောပါတယ်။
အဲဒီလူနာကို နာခေါင်း၊ အာခေါင်တို့ဖတ် Swab ရယူပြီး စစ်ဆေးရာမှာ ၇ ကြိမ်နှင့် ၈ ကြိမ်တို့မှာ nagetive ပြတာကြောင့် မေလ ၂၉ ရက်နေ့မှာတော့ ဆေးရုံက ဆင်းခွင့်ပြုလိုက်တာဖြစ်ပါတယ်။
စစ်ကိုင်းမြို့ ကုတင် ၂၀၀ ဆံ့ ဆေးရုံအုပ်ကြီး ဒေါက်တာ စုစုထွန်းက "nagetive ၂ ခါဖြစ်လို့ ပေးဆင်းလိုက်ပါပြီ။ သူ့ကို စစ်ကိုင်းမြို့မှာရှိတဲ့ ငြိမ်းသီရိဟိုတယ်မှာ Hotel Quarantine ၁၄ ရက်တိတိထားမှာဖြစ်ပါတယ်။ တို့ဖတ်နမူနာ ၈ ကြိမ်ရယူခဲ့ရပါတယ်။ အစောပိုင်းက Positive ပြလိုက် Nagetive ပြလိုက်နဲ့ ၇ ကြိမ်မြောက်မှာ nagetive စဖြစ်တာ။ ၈ ကြိမ်မြောက်မှာလည်း nagetive ဆိုတော့ ၂ ခါဆက်တိုက် nagetive ဆိုတော့ ပေးဆင်းလို့ရတယ်။ Facility Quarantine or Hoter Quarantine ပေါ့။ လူနာက တတ်နိုင်တဲ့အတွက် ဟိုတယ်မှာထားတာပေါ့။ ဒါပြီးရင် Follow up ပြန်လိုက်မှာပါ။ သူအခြေအနေကောင်းတယ်ဆိုရင် Home Quarantine ၁ ပတ်ပါ။ အဲဒါပြီးရင် ရသွားပါပြီ။"လို့ ပြောပါတယ်။
အဆိုပါ လူနာက သွေးတိုးရောဂါကလွဲရင် ကျန်တဲ့ ရောဂါ ဘာမှမဖြစ်ဘူးလို့လည်း သိရပါတယ်။
စစ်ကိုင်းက ကိုဗစ်-၁၉ လူနာ ဒီကနေ့ ဆေးရုံကဆင်းတာကိုတော့ ဆေးရုံဝန်ထမ်းတွေနဲ့ အားလုံးက လက်ခုပ်တီးကာ ပန်းစည်းတွေနဲ့ ကြိုဆိုဂုဏ်ပြုပေးခဲ့ကြပါတယ်။
ရောဂါပိုးတွေ့ရှိသူကို အလှည့်ကျ ကုသပေးခဲ့တဲ့ ကျန်းမာရေးဝန်ထမ်းတွေကတော့ ကာကွယ်ပစ္စည်းအပြည့်အစုံနဲ့ ကုသပေးခဲ့တာဖြစ်ပြီး အားလုံးကျန်းမာရေးကောင်းမွန်တယ်လို့ ဆိုပါတယ်။ လူနာဆေးရုံက ဆင်းခွင့်ရတဲ့အပေါ်မှာ လူနာတင်မက အားလုံးကလည်း ဝမ်းသာကြတယ်လို့ဆိုပါတယ်။
"ဘယ်သူမှလည်း ဒါကိုဖြစ်ချင်ကြမှာမဟုတ်ဘူးလေ။ ဒီရောဂါပိုးကင်းစင်တာ ၂ ကြိမ်ပြဖို့ဆိုတာ တော်တော်ကြီးကို ကုသိုလ်ကံကောင်းတယ်လေ။ အဲဒါတော့ သူလည်း ဝမ်းသာသလို ကျမတို့လည်း ဝမ်းသာတာပေါ့ရှင်။"လို့ ဆေးရုံအုပ်ကြီး ဒေါက်တာ စုစုထွန်းက ပြောပါတယ်။
သီတဂူဆရာတော်ရဲ့ အစီအစဉ်နဲ့ အိန္ဒိယကနေ ဧပြီ ၂၂ ရက်နေ့က ပြန်လည်ရောက်ရှိလာတဲ့ စာသင်သားရဟန်းသံဃာ ၂၁၁ ပါး၊ သီလရှင် ၅ ပါးနှင့် လူပုဂ္ဂိုလ်အမျိုးသား ၁၉ ဦး၊ အမျိုးသမီး ၂၂ ဦး စုစုပေါင်း ၂၅၇ ဦးတို့ထဲက အဆိုပါ လူပုဂ္ဂိုလ်တစ်ဦးမှာ ကိုဗစ်-၁၉ ပိုး တွေ့ရှိခဲ့တာပါ။
မေလ ၂၈ ရက်ကလည်း သီတဂူဆရာတော်ရဲ့ အကူအညီနဲ့ အိန္ဒိယကနေ သံဃာ၊ သီလရှင်နှင့် လူပုဂ္ဂိုလ်စုစုပေါင်း ၆၇ ဦးထပ်မံရောက်ရှိလာပြီး လက်ရှိမှာ သီတဂူဝိပဿနာကျောင်းမှာ Quarantine ထားရှိကာ ဇွန်လ ၂ ရက်နေ့မှာ နှာခေါင်း၊ အာခေါင်တို့ဖတ်နမူနာတွေ ရယူပြီး စစ်ဆေးသွားမယ်လို့ သိရပါတယ်။
စစ်ကိုင်းတိုင်းမှာ ကိုဗစ်-၁၉ အတည်ပြုလူနာ ၇ ဦးတွေ့ရှိခဲ့ပါတယ်။ လက်ရှိမှာ အားလုံးက ဆေးရုံက ဆင်းခွင့်ရပြီဖြစ်လို့ ရောဂါပိုးတွေ့ရှိသူ မရှိတော့ပါဘူး။ လတ်တလောမှာတော့ ဓာတ်ခွဲအဖြေစောင့်ဆိုင်းသူ စစ်ကိုင်းတိုင်းမှာ ၈ ဦးရှိနေပါသေးတယ်။
