နိုင်ငံတော် အရန်ရိက္ခာဝယ်ယူဖို့ ငွေကျပ် ၃၈ ဘီလီယံ ခွင့်ပြုချက်ရရှိထားတယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့်က ပြောတယ်။
ဧပြီ ၂၂ ရက်ကပြုလုပ်တဲ့ နိုင်ငံတော်အရန်ရိက္ခာဝယ်ယူစုဆောင်ရေး၊ ကုန်စျေးနှုန်း တည်ငြိမ်ရေးနဲ့ ကုန်စည်စီးဆင်းမှုအဆင်ပြေ ချော့မွေ့စေရေးအွန်လိုင်းညှိနှိုင်းအစည်းအဝေးမှာ ပြောဆိုခဲ့တာပါ။
ဒီခွင့်ပြုငွေနဲ့ အရေးပေါ်ရိက္ခာအဖြစ် အဓိကကျတဲ့ ဆန်နဲ့ဆီကိုဝယ်ယူသွားမှာဖြစ်ပြီး၊ ဆန်တန်ချိန် ၅၀၀၀၀ ၊ စားအုန်းဆီတန်ချိန် ၁၂၀၀၀ ဝယ်ယူသွားမယ်လို့ဆိုပါတယ်။
ဒီနိုင်ငံတော် အရန်ရိက္ခာတွေကို COVID-19 ရောဂါပြန့်ပွားမှုနှုန်း မြင့်တက်လာပါက အရေးပေါ် ရိက္ခာအဖြစ်နဲ့ သုံးစွဲသွားမှာပါ။
ရိက္ခာ၀ယ်ယူရေးကိစ္စအတွက် ကုန်သည်စက်မှုအသင်းချုပ်၊ မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းနဲ့ မန္တလေးတိုင်းက ကုန်သည်လုပ်ငန်းရှင် အသင်းအဖွဲ့တွေနဲ့ ညှိနှိုင်းဆွေးနွေးထားပြီးဖြစ်တယ်လို့သိရပါတယ်။
၀န်ကြီးဌာနအနေနဲ့ COVID-19 ကပ်ဘေးကာလအတွင်း ကုန်စျေးနှုန်းတည်ငြိမ်စေဖို့ အခြေခံလူတန်းစားတွေဆီကို ကုန်စည်ဖြန့်ဖြူးရာမှာ အဆင်ပြေချော့မွေ့စေဖို့ အတွက်လည်း ဆောင်ရွက်နေတယ်လို့ စီးပွားကူးသန်းဝန်ကြီးက သူ့ရဲ့ လူမှုကွန်ရက်စာမျက်နှာမှာ သတင်းထုတ်ပြန်ထားပါတယ်။
သတင်း- စိုးချစ်ပိုင်၊ ဓာတ်ပုံ- U Than Myint
