အစ္စရေးကို နိုင်ငံအဖြစ် ဆော်ဒီအာရေဗျအနေနဲ့ အသိအမှတ်ပြုမှသာ နျူကလီးယားစွမ်းအင် ထုတ်လုပ်လာနိုင်အောင် ကူညီသွားမှာဖြစ်တယ်လို့ အမေရိကန်သမ္မတ ဒေါ်နယ်ထရမ့်ပ်က သတိပေးလိုက်ပါတယ်။
အဲဒီနောက် ထရမ့်ပ်က “စစ်ဘက်သုံးမဟုတ်တဲ့ အရပ်ဘက်သုံး နျူကလီးယား သဘောတူညီချက်အရ အဆင့်မြှင့်တင်ခွင့်ရှိမှာ မဟုတ်တာကြောင့် ဒါကို ခွင့်ပြုပေးသွားမှာပါ” ဆိုပြီး Truth Social ပေါ်မှာ ပို့စ်တင်ထားပါတယ်။
“ဒါပေမဲ့လည်း ဆော်ဒီအာရေဗျက အေဘရာဟမ် သဘောတူစာချုပ်ထဲကို ပူးပေါင်းပါဝင်လာခြင်း ရှိ၊ မရှိ ဆိုတဲ့ အချက်အပေါ်မှာ အပြည့်အဝ မူတည်နေတယ်” လို့လည်း ဖြည့်စွက်ပြောပါတယ်။
အခုလိုမျိုး ထရမ့်ပ်ရဲ့ ပြောဆိုချက်တွေနဲ့ ပတ်သက်ပြီး ဆော်ဒီဘက်က သဘောတူထားပြီးသားလား ဆိုတာကိုတော့ ရှင်းရှင်းလင်းလင်း မသိရသေးပါဘူး။
တချိန်တည်းမှာ အိမ်ဖြူတော်ရဲ့ ပြောရေးဆိုခွင့်ရှိသူ ကယ်ရိုလိုင်း လဲဗစ်က “ဆော်ဒီသာ အေဘရာဟမ် စာချုပ်ထဲမှာ မပါဝင်ဘူးဆိုရင် သဘောတူညီချက် ဖျက်သိမ်းမယ်ဆိုတာကို သမ္မတအနေနဲ့ ပြောပြထားပြီးဖြစ်တယ်” လို့ မှတ်ချက်ပေးပါတယ်။
ဒါကြောင့် အစ္စရေးကာကွယ်ရေးဝန်ကြီးဟောင်း အဗစ်ဒေါ လီဘာမန်ဟာ “စစ်ဘက်ဆိုင်ရာ နျူကလီးယား အစီအစဉ်တိုင်းကို အရပ်ဘက်ကနေ စတင်ခဲ့တာချည်းပါပဲ” ဆိုပြီး တုံ့ပြန်သွားပါတယ်။
ဇူလိုင် ၂၂ ရက်က ကြေညာခဲ့တဲ့ သဘောတူညီချက်ဟာ မတည်မငြိမ် ဖြစ်နေပြီးသား ဒေသတွင်းကို နောင်တချိန်မှာ နျူကလီးယားလက်နက် ပြန့်ပွားလာစေနိုင်တယ်ဆိုတဲ့ ကျွမ်းကျင်သူတွေရဲ့ ဝေဖန်မှုတွေလည်း ရှိနေပါတယ်။
ဒါ့အပြင် ထရမ့်ပ် ပထမသက်တမ်းအတွင်း ယူအေအီးနဲ့ ဘာရိန်းနိုင်ငံတွေဟာ အေဘရာဟမ်စာချုပ်ကို လက်မှတ်ရေးထိုးခဲ့ပြီးနောက် အဲဒီကနေတဆင့် အာရပ် ၂ နိုင်ငံနဲ့ အစ္စရေးကြားမှာ ပထမဆုံးအကြိမ် သံတမန်ဆက်ဆံရေး ထူထောင်နိုင်ခဲ့ပါတယ်။
ဒီစာချုပ်ကို ဆူဒန်၊ မော်ရိုကိုနဲ့ ကာဇက်စတန် နိုင်ငံတွေကပါ လက်မှတ်ရေးထိုးထားပြီး ဖြစ်ပါတယ်။
ဆော်ဒီဘက်ကတော့ ပါလက်စတိုင်းနိုင်ငံကို တရားဝင် တည်ထောင်ပေးခြင်း မရှိသေးသရွေ့ အေဘရာဟမ်စာချုပ်ထဲ ပါဝင်မှာ မဟုတ်ဘူးလို့ အကြိမ်ကြိမ် ပြောဆိုခဲ့ဖူးပါတယ်။
၂၀၁၈ ခုနှစ်အတွင်း CBS သတင်းဌာနနဲ့ အင်တာဗျူးမှာ ဆော်ဒီအိမ်ရှေ့စံမင်းသား မိုဟာမက် ဘင် ဆယ်မန် ကလည်း “သံသယဖြစ်စရာ မလိုပါဘူး။ အီရန်သာ နျူကလီးယားဗုံး ထုတ်လုပ်လာခဲ့ရင် သူတို့နောက်ကို အတတ်နိုင်ဆုံး အမီလိုက်မှာပါ” ဆိုပြီး ပြောထားပါတယ်။
