DVB Logo
Home
မြန်မာသတင်း

အနည်းဆုံးအခကြေးငွေဥပဒေကို ပြင်ဆင်သည် ဥပဒေကြမ်း လွှတ်တော်တင်သွင်း

နေဖြိုးဝင်း
·
January 30, 2020
အနည်းဆုံးအခကြေးငွေဥပဒေကို ပြင်ဆင်သည် ဥပဒေကြမ်း လွှတ်တော်တင်သွင်း
Donate to DVB

အနည်းဆုံးအခကြေးငွေကို နှစ်နှစ် တစ်ကြိမ် သတ်မှတ်ပေးရတာကို ပြင်ဆင်တဲ့ အနည်းဆုံးအခကြေးငွေဥပဒေကို ပြင်ဆင်တဲ့ ဥပဒေကြမ်းတခု  ဒီကနေ့ ဇန်နဝါရီ ၃၀ ရက်နေ့ အမျိုးသားလွှတ်တော်အစည်းအဝေးမှာ တင်သွင်းလိုက်ပါတယ်။

တည်ဆဲအလုပ်သမားဥပဒေတွေကို လေ့လာသုံးသပ်ပြီး လတ်တလောပြင်ဆင်ဖို့ လိုအပ်တဲ့ဥပဒေတွေကို ဦးစားပေးအဆင့် သတ်မှတ်ကာ ၂၀၁၃ ခုနှစ် အနည်းဆုံးအခကြေးငွေ ဥပဒေကို ပြင်ဆင်ပြဋ္ဌာန်းနိုင်ဖို့အတွက် တင်သွင်းရတာဖြစ်တယ်လို့ ဆိုပါတယ်။

ဒီပြင်ဆင်တဲ့ဥပဒေကြမ်းကို ရန်ကုန်တိုင်းဒေသကြီး၊ မဲဆန္ဒနယ်အမှတ် (၈)က အမျိုးသားလွှတ်တော်ကိုယ်စားလှယ် လူဝင်မှုကြီးကြပ်ရေးနှင့် ပြည်တွင်းပြည်ပ အလုပ်သမားဆိုင်ရာကော်မတီဥက္ကဋ္ဌ ဦးကျော်ထွေးက တင်သွင်းလိုက်တာဖြစ်ပါတယ်။

လက်ရှိဥပဒေမှာ အနည်းဆုံးအခကြေးငွေ သတ်မှတ်တာကို အလုပ်ရှင်၊ အလုပ်သမား၊ အစိုးရ ကိုယ်စားလှယ်တွေ သုံးပွင့်ဆိုင်သဘောတူညီချက်နဲ့ သတ်မှတ်ဖို့ ပြဋ္ဌာန်းထားတာဟာ ပြည့်စုံ လုံလောက်မှုမရှိဘဲ စီးပွားရေးပညာရှင်၊ အလုပ်သမားရေးရာကျွမ်းကျင်ပညာရှင် အစရှိသူတွေ ပါဝင်သင့်တယ်လို့ ဦးကျော်ထွေးက ပြောပါတယ်။

“နောက်တစ်ခုအနေနဲ့ ပုဒ်မ ၅၊ ပုဒ်မခွဲ(ဇ)မှာ အနည်းဆုံးအခကြေးငွေ သတ်မှတ်ဖို့အတွက် နှစ်နှစ်ကို အနည်းဆုံး တစ်ကြိမ် ပြင်ဆင်သတ်မှတ်ရမယ်ဆိုတဲ့ ပြဋ္ဌာန်းချက်ဟာ နှစ်နှစ်ပြည့်ကာနီး တိုင်း အလုပ်သမားတွေရဲ့ လုပ်ခလစာတိုးမြှင့်ရလိုတာ၊ အလုပ်ရှင်တွေရဲ့ ရင်းနှီးမြှုပ်နှံမှု သဘော အရ ခန့်မှန်းကုန်ကျစရိတ် တွက်ချက်ထားလို့ တိုးမြှင့်ပေးဖို့ ခက်ခဲတာတွေကြောင့် လုပ်ငန်းခွင် တည်ငြိမ်မှုကို ထိခိုက်စေတာတွေ ဖြစ်ပေါ်လာစေနိုင်ပါတယ် ” လို့ ဦးကျော်ထွေးက ပြောပါတယ်။

၂၀၁၅ ခုနှစ် သြဂုတ်လ ၂၀ ရက်နေ့မှာ တစ်နေ့အလုပ်ချိန် (၈)နာရီကို ၃၆၀၀ ကျပ်၊ ၂၀၁၈ ခုနှစ် မေလမှာ ၄၈၀၀ ကျပ် ပြင်ဆင်သတ်မှတ်ပေးခဲပြီး ၂၀၂၀ မေလမှာ ပြင်ဆင်သတ်မှတ်ပေးရ တော့မှာ ဖြစ်ပါတယ်။ 

အနည်းဆုံးအခကြေးငွေ သတ်မှတ်တာမျိုးကို နိုင်ငံရဲ့ ပကတိစီးပွားရေးဖွံ့ဖြိုးတိုးတက်မှု၊ ကုန်စျေးနှုန်းအခြေအနေ၊ လူနေမှုစရိတ် စတာတွေကို အမျိုးသားကော်မတီအဖွဲ့က စဉ်ဆက်မပြတ် ဘက်စုံချင့်ချိန်သုံးသပ်နေပြီး အချိန်အခါသင့်တဲ့အခါမှ ဆောင်ရွက်သင့်တယ်လို့လည်း ဦးကျော်ထွေးက ပြောပါတယ်။

“တစ်နှစ်အတွင်းလည်း ပြင်ဆင့်သင့်ရင် ပြင်ရမယ်၊ ဆယ်နှစ်အတွင်းလည်း ပြင်ဆင်သင့်ရင် ပြင်ရမယ်လို့ မြင်ပါတယ်။ စီးပွားရေးပညာသဘောအရဆိုရင်လည်း နှစ်နှစ် တစ်ကြိမ် ပြင်ဆင်ရမယ်လို့ ကြိုတင်သတ်မှတ်ထားတာဟာ ဘယ်လိုမှ မဖြစ်သင့် မဖြစ်ထိုက်ပါဘူး။ အလုပ်ရှင်တွေအတွက်ရော၊ အလုပ်သမားတွေအတွက် သာမက အစိုးရအတွက်ပါ ဖိအားတွေ ဖြစ် စေနိုင်ပါတယ် ” လို့ ဆိုပါတယ်။

အခုလို ပြင်ဆင်တဲ့ဥပဒေကြမ်းတင်သွင်းတာကို ကန့်ကွက်သူမရှိတဲ့အတွက် လက်ခံဆွေးနွေးဖို့ အမျိုးသားလွှတ်တော်က ဆုံးဖြတ်လိုက်ပါတယ်။

၂၀၁၃ ခုနှစ် အနည်းဆုံးအခကြေးငွေဥပဒေကို ၂၀၁၃ ခုနှစ် မတ်လ ၂၂ ရက်နေ့မှာ ပြဋ္ဌာန်းခဲ့ပြီး နည်းဥပဒေကို ဇူလိုင်လ ၁၂ ရက်နေ့မှာ ထုတ်ပြန်ခဲ့ပါတယ်။

Support DVB
Live
DVB Donate
မြန်မာနိုင်ငံအပေါ် အရေးယူဒဏ်ခတ်မှုများ
DVB Logo

About Us

For over 30 years, the Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB is registered as a non-profit association in Thailand.

Follow Us

© Democratic Voice of Burma 2013