Homeမြန်မာသတင်း
ငါန်းဇွန် ဓမ္မာရုံဘုန်းတော်ကြီးသင်ပညာရေးကျောင်း သင်ထောက်ကူနှင့် စားသောက်ရေး အခက်ကြုံ
ငါန်းဇွန် ဓမ္မာရုံဘုန်းတော်ကြီးသင်ပညာရေးကျောင်း သင်ထောက်ကူနှင့် စားသောက်ရေး အခက်ကြုံ
DVB
·
January 8, 2020
မန္တလေးတိုင်း၊ မြင်းခြံခရိုင်၊ ငါန်းဇွန်မြို့နယ် ဖြူတွင်းကုန်းကျေးရွာက ဓမ္မာရုံ ဘုန်းတော်ကြီးသင်ပညာရေးကျောင်း ပရဟိတ သာသနာပြုဌာနမှာ သင်ထောက်ကူပစ္စည်းတွေနဲ့ စားသောက်ရေး အခက်အခဲဖြစ်နေတယ်လို့ သိရပါတယ်။
ဒီကျောင်းကို ဆရာတော်အရှင်ဥတ္တရ (အနာဂတ်အလင်း လူငယ် ဖွံ့ဖြိုးရေး) ကနေ ဦးဆောင်မှုပြုလုပ်ပြီး ၂၀၁၄-၂၀၁၅ ပညာသင်နှစ်က စတင်ဖွင့်လှစ်ခဲ့တာပါ။
စာသင်ကြားရေး စတင်ခဲ့စဉ်က အစစအရာရာအားနည်းမှုတွေနဲ့ ရင်ဆိုင်လုပ်ကိုင်ခဲ့ရကာ စာသင်ဆောင်ကို ဂျပန်နိုင်ငံရဲ့ကူညီထောက်ပံ့မှုနဲ့ တည်ဆောက်ခဲ့ပြီး အခုချိန်မှာ ကျောင်းသားအင်အားများလာတာကြောင့် သင်ထောက်ကူအပိုင်းနှင့် စားသောက်ရေးအပိုင်းမှာ အခက်အခဲဖြစ်ပေါ်နေတာလို့ အရှင်ဥတ္တရက မိန့်ပါတယ်။
“လက်ရှိသင်ကြားရေးပိုင်းမှာ kg တန်းကနေ ၁၀ တန်းအထိ သင်ကြားပေးနေတာပါ။ သင်ကြားရေးအပိုင်း ကုန်ကျစရိတ်အပါအဝင် စားသောက်မှုအပိုင်းတွေကို ဦးဇင်းရဲ့ သာရေး နာရေးကရတဲ့ နဝကမ္မလေးတွေနဲ့ ဖြေရှင်းနေရတာ။ အခုဆိုရင် တိုင်းရင်းသားလေးတွေကလည်း တိုးလာတော့ စားသောက်ရေးဆိုရင် ပိုပြီးဆင်းရဲလာတယ်။ ကျောင်းဆရာ /ဆရာမ အင်အားလည်းများလာတော့ ထောက်ပံ့ငွေ အခက်အခဲပါ တွေ့ကြုံနေရတယ်” လို့ အရှင်ဥတ္တရက မိန့်ပါတယ်။
ငါန်းဇွန်မြို့နယ် ဖြူတွင်းကုန်းရွာနေ ဆရာမ ဒေါ်နုနုယဉ်က "သင်ထောက်ကူပစ္စည်းပိုင်းကတော့ ဦးဇင်းကလည်း ဝယ်ပေးပေမယ့် ငွေရေးကြေးရေး အခက်အခဲရှိ တာပေါ့။ ကိုယ်က ပရဟိတ ကျောင်းဆိုတော့ လှူဒါန်းမယ့်သူများရင် ပိုပြီးတော့သုံးလို့ရတာပေါ့။ လှူဒါန်းမယ့်သူနည်းရင်တော့ လိုသလောက်ချင့်ချိန်ပြီး သုံးရတာပေါ့။ ငွေရေးကြေးရေးအပါအဝင် သင်ထောက်ကူပစ္စည်းတွေလည်း ပိုပြီးကူညီပေးစေချင်တယ်။ ကလေးတွေလည်း ပညာရေးမှာ ပိုပြီး ထိရောက်အောင်သင်ကြားနိုင်တာပေါ့။ နိုင်ငံတော်အစိုးရအနေနဲ့ကတော့ သင်ထောက်ကူပစ္စည်း ထောက်ပံ့ပေးထားတာရှိသလို ကျောင်းသားဦးရေကြည့်ပြီး တလကို ၁ သိန်းကျော်ထောက်ပံ့ ပေးပါတယ်"လို့ ပြောပါတယ်။
အဲဒီကျောင်းမှာ ပညာသင်ယူနေတဲ့ ရှမ်းပြည်နယ် ကျောက်မဲမြို့နယ် ကုန်းသာကျေးရွာမှ ကျောင်းသူ မနန်းအေးမိုးက "သမီးတို့ရွာမှာ စာသင်တဲ့အချိန်အဆင်မပြေဘူး။ တခါတလေ စစ်ပွဲတွေဖြစ်တယ်။ ပညာရေးကလည်း အဆင်မပြေဘူး။ အေးအေးချမ်းချမ်းလည်း မသင်ရဘူး။ တခါတလေ ပြေးရတယ်။ ပညာရေးမှာလည်း ၄ တန်းပြီးရင် တက်ဖို့အခက်အခဲဖြစ်လို့ ဒီဘက်လာသင်တာ။ ဒီဘက်သင်ရတာ အဆင်လည်းပြေတယ်။ ပျော်လည်း ပျော်တယ်"လို့ ပြောပါတယ်။
အဲဒီကျောင်းမှာ ကျောင်းတွင်းပညာရေးသာမက ကျောင်းပြင်ပ ပညာရေးအဖြစ် နွေရာသီ ကျောင်းပိတ်ရက်တွေမှာလည်း အသက်မွေးဝမ်းကြောင်းအထောက်အကူပြု အခြေခံစက်ချုပ် သင်တန်း နဲ့ အခြေခံကွန်ပျူတာအသုံးပြုနည်း သင်တန်းတွေအပြင် ဥတ္တရအလင်း စာကြည့်တိုက် တို့ကိုလည်း ဖွင့်လှစ်ထားရှိတယ်လို့ သိရပါတယ်။
ဓမ္မရုံဘုန်းတော်ကြီးသင်ပညာရေးကျောင်းမှာ kg တန်းကနေ ၁၀ တန်းအထိရှိပြီး ကျောင်သားဦးရေ ၁၆၀ လောက်ရှိပြီး ဆရာ/ဆရာမ ၁၃ ယောက်က ပညာသင်ကြားပေးနေတာပါ။
ဒီကျောင်းမှာ ဒေသတွင်း ကလေးငယ်တွေသာမက တောင်ပေါ်ဒေသမှ တိုင်းရင်းသားကလေးတွေလည်း လာရောက်ပြီး ပညာသင်ကြားနေကြပါတယ်။
ဌေးလှိုင်
