၂၀၂၀ ပြည့်နှစ် ဇန်နဝါရီ ၁ ရက်နေ့မှာ မြန်မာနိုင်ငံရဲ့ လူဦးရေဟာ ၅၄ ဒသမ ၄၅ သန်းပြည့်ခဲ့ပြီလို့ ပြည်သူ့အင်အားဦးစီးဌာနက ထုတ်ပြန်ပါတယ်။
၂၀၁၄ ခုနှစ်မှာ ကောက်ယူခဲ့တဲ့ ပြည်လုံးကျွတ်လူဦးရေသန်းခေါင်စာရင်းကို အခြေခံ တွက်ချက်ထားတာဖြစ်ပြီး လူဦးရေတိုးနှုန်း (အလယ်အလတ်) ခန့်မှန်းတွက်ချက်မှုအရ ဇန်နဝါရီ ၁ ရက် မနက် ၁၁ နာရီကျော်လောက်မှာ တနိုင်ငံလုံး လူဦးရေဟာ ၅၄,၄၅၈,၂၄၁ ရှိနေတယ်လို့ ဆိုပါတယ်။
မြန်မာနိုင်ငံရဲ့ လူဦးရေအခြေအနေအပြောင်းအလဲကို ပြည်သူ့အင်အားဦးစီးဌာနရဲ့ www.dop.gov.mm ဝဘ်ဆိုက်ကနေ မိနစ်တိုင်းမှာ အချိန်နဲ့တပြေးညီ မှတ်တမ်းပြုလုပ် ပေးထားပါတယ်။
ပြည်သူ့အင်အားဦးစီးဌာနအနေနဲ့ နိုင်ငံတော်ရဲ့ လူမှုစီးပွားရေးစီမံကိန်းတွေနဲ့ လုံခြုံရေးဆိုင်ရာ ကိစ္စရပ်တွေအတွက် အထောက်အကူဖြစ်စေမယ့် လူဦးရေကိန်းဂဏန်းတွေ ရရှိစေဖို့ စစ်တမ်းတွေကောက်ယူနေတာဖြစ်ပါတယ်။
ဒါ့အပြင် နိုင်ငံတော်ရဲ့ ဒေသအသီးသီးအလိုက် လူဦးရေခန့်မှန်းတာ၊ ပြည်တွင်းပြည်ပ လူဦးရေဆိုင်ရာ လှုပ်ရှားမှုလုပ်ငန်းတွေအတွက် ကုလသမဂ္ဂ လူဦးရေ ရန်ပုံငွေအဖွဲ့နဲ့ ပူးပေါင်းဆောင်ရွက်တာ စတာတွေကို လုပ်ဆောင်နေတယ်လို့ ဆိုပါတယ်။
၂၀၁၄ ခုနှစ်မှာ ကောက်ယူခဲ့တဲ့ ပြည်လုံးကျွတ်လူဦးရေသန်းခေါင်စာရင်းအရ ၂၀၁၄ မတ်လ ၂၉ ရက်ညမှာရှိတဲ့ မြန်မာနိုင်ငံရဲ့ စုစုပေါင်း လူဦးရေကတော့ ၅၁,၄၈၆,၂၅၃ ဦးဖြစ်ပါတယ်။
