အမေရိကန်နိုင်ငံ တင်နက်ဆီပြည်နယ်မှာ သေဒဏ်ကျ အမျိုးသမီး ခရစ္စတာပိုက်ခ်ကို သေဒဏ်ဆေး ၂ ကြိမ်ထိုးအပြီးမှာ  အသက်ရှင်နေဆဲ ဖြစ်တာကြောင့် ၂၀၂၆ နှစ်ကုန်အထိ သေဒဏ်ပေးမှုအားလုံးကို ဆိုင်းငံ့လိုက်ပါတယ်။

အသက် ၅၀ အရွယ် ပိုက်ခ်ကို စက်တင်ဘာ ၃၀ ရက် ညက နက်ရှ်ဗီးလ်မြို့ရှိ လုံခြုံရေး အမြင့်ဆုံး ချထားတဲ့ အကျဉ်းထောင်မှာ ပန်တိုဘာဘစ်တယ်လ်ဆေး ၂ ကြိမ် ထိုးခဲ့ပေမဲ့ သေဆုံးခြင်း မရှိခဲ့တာပါ။

လက်ရှိမှာ သူဟာ စိုးရိမ်ရတဲ့ အခြေအနေရှိပြီး ဆေးရုံမှာ အသက်ကယ်ကုသမှု ခံယူနေတယ်လို့ ရှေ့နေ  ရန်ဒီစပိုင်ဗီက ပြောပါတယ်။

ဒုတိယအကြိမ် ဆေးထိုးပြီး နောက်မှာတောင် ပိုက်ခ် အသက်ရှူနေဆဲဖြစ်ပြီး ဟောက်သံပါ ကြားရတယ်လို့ ကြည့်ရှုခွင့်ရခဲ့တဲ့ သတင်းထောက်တွေက ပြောပါတယ်။

သေဒဏ်ပေးရေးအဖွဲ့ဟာ သွေးကြောထဲ ဆေးသွင်းဖို့ တနာရီလောက် ကြိုးစားခဲ့ပြီး ဘယ်ဘက်လက်တဖက်တည်းမှာ အပ်အနည်းဆုံး ၇ ချောင်း အသုံးပြုခဲ့ရတယ်လို့ ရှေ့နေက ပြောပါတယ်။

တင်နက်ဆီ အုပ်ချုပ်ရေးမှူး ဘီလ်လီက ဒီဖြစ်ရပ်ဟာ “အင်မတန် စိတ်အနှောင့်အယှက်ဖြစ်စရာ” ဖြစ်တယ်လို့ ပြောပြီး လွတ်လပ်တဲ့ စုံစမ်းစစ်ဆေးမှု ပြုလုပ်ဖို့ အမိန့်ပေးထားပါတယ်။

တင်နက်ဆီ အကျဉ်းဦးစီးဌာနကတော့ သတ်မှတ်ထားတဲ့ တရားဝင် သေဒဏ်ပေးရေး လုပ်ထုံးလုပ်နည်း အားလုံးကို လိုက်နာခဲ့တယ်လို့ တုံ့ပြန်ထားပါတယ်။

ပိုက်ခ်ဟာ အသက် ၁၈ နှစ်အရွယ်က သူ့ရည်းစား တာဒါရယ်ရှစ်ပ်နဲ့ တခြားအမျိုးသမီး တယောက်တို့နဲ့အတူ အသက် ၁၉ နှစ်အရွယ် ကော်လင်းစလမ်မာကို သတ်ဖြတ်ခဲ့မှုနဲ့ ၁၉၉၆ ခုနှစ်မှာ သေဒဏ်ချမှတ်ခံခဲ့ရသူ ဖြစ်ပါတယ်။

သူ့ရှေ့နေတွေက အခု သေဒဏ်ကို တခြားပြစ်ဒဏ်အဖြစ် ပြောင်းလဲပေးဖို့ တောင်းဆိုနေပါတယ်။

ဒီဖြစ်ရပ်ဟာ ၂၀၂၆ ခုနှစ်အတွင်း တင်နက်ဆီမှာ ဒုတိယအကြိမ် မအောင်မြင်တဲ့ သေဒဏ်ပေးမှုဖြစ်ပြီး မေလကလည်း အကျဉ်းသား တိုနီကာရုသာစ်ကို သွေးကြောရှာမရလို့ သေဒဏ်ပေးမှု ရပ်ဆိုင်းခဲ့ရပါတယ်။