ကရင်အမျိုးသားအစည်းအရုံး(KNU) တပ်မဟာ ၃ နယ်​မြေ၊ ​ညောင်​လေးပင်ခရိုင်ထဲက ထီးကလယ်ရွာနဲ့ ​ဝါးဖြူ​တောင် ဘုန်းကြီး​ကျောင်းကို စစ်အာဏာရှင်တပ်က ဗုံးကြဲတိုက်ခိုက်တယ်လို့ ​ဒေသခံ​တွေဆီက သိရပါတယ်။

စက်တင်ဘာ ၁၁ ရက် မနေ့ နေ့လယ်ပိုင်းက ဂျက်ဖိုက်တာ ၂ စင်းနဲ့ ပေါင် ၃၀၀ ဗုံး ၆ လုံး ကြဲချပြီး ပွိုင့် ၅ နဲ့လည်း ပစ်ခတ်ထိခိုက်သွား​ပေမဲ့ ထိခိုက်ပျက်စီးတာမရှိဘူးလို့ ဆိုပါတယ်။

​​ဒေသခံတ​ယောက်က “တိုက်ပွဲမဖြစ်ပွားဘဲ လေယာဥ်နဲ့ လာပစ်တာ။ ထိခိုက်မှုမရှိဘူး။ ရွာအစွန်ဆို တော့ ဘာမှမထိခိုက်တာ။ နှစ်​နေရာကို ကြဲတာ​ပေါ့။ ဘုန်းကြီး​ကျောင်း သိမ်နားကိုကျတာလည်း ရှိတယ်” လို့ DVB ကို ​ပြောပါတယ်။

​ညောင်​လေးပင်ခရိုင်ထဲမှာ ကျောက်ကြီးမြို့နယ်နဲ့ လယ်ဒိုမြို့နယ်တို့ပါဝင်ပြီး အာဏာရှင်စစ်တပ်က ကျေးရွာ​တွေ၊ စာသင်ကျောင်း​တွေနဲ့ ဘုန်းကြီးကျောင်းတွေကိုပါ ဗုံးကြဲတိုက်ခိုက်လေ့ရှိတာပါ။

ကျောက်ကြီးနဲ့ ​ရွှေကျင်အစပ်က ဝါးဖြူတောင်ဘုန်းကြီးကျောင်းနဲ့ ထီးကလယ်ရွာဟာ စစ်တပ်နဲ့ KNLA၊ PDF ပူးပေါင်းတပ်ဖွဲ့​တွေအကြား တိုက်ပွဲ​​တွေ မကြာခဏဖြစ်ပွား​လေ့ရှိတဲ့ ​နေရာ ဖြစ်ပါတယ်။

KNU တပ်မဟာ ၃ မှာ ပဲခူးတိုင်းအရှေ့ဘက်ခြမ်း ညောင်လေးပင်၊ ကျောက်ကြီး၊ ရွှေကျင်၊ မုန်းမြို့နယ်​နဲ့ ကရင်ပြည်နယ်၊ မွန်ပြည်နယ်အစပ် ဒေသတချို့ပါဝင်ပြီး စစ်ရေးတင်းမာနေသလို လေကြောင်းအန္တရာယ်ကြောင့် ဒေသခံ​တွေစိုးရိမ်ပူပန်နေရတဲ့ အခြေအနေဖြစ်တယ်လို့ သိရပါတယ်။