စစ်ကိုင်းတိုင်း၊ ချင်းတွင်းမြစ်ကမ်းဘေးရှိ မင်းကင်းမြို့က အထင်ကရ ဘုရားပွဲတခုဖြစ်တဲ့ ရွှေစကားဗုဒ္ဓပူဇနိယ ဘုရားပွဲကို သီတင်းကျွတ်လပြည့်ကျော် ၅ ရက်နေ့ကနေ ၈ ရက်နေ့ထိ စည်ကားသိုက်မြိုက်စွာ ကျင်းပနေပါတယ်။
ဘုရားပွဲတော် စတင်တဲ့ သီတင်းကျွတ်လပြည့်ကျော် ၅ ရက်နေ့မှာတော့ မင်းကင်းမြို့ မဟာမင်းကျောင်းရှိ ရွှေစကားဘုရား၊ မရမ်းကျောင်းရှိ မြသိန်းတန်ဘုရား၊ ကြီးတောင်ဦးကျေးရွာရှိ ရတနာမဉ္ဇူဘုရားနှင့် မင်းကင်းမြို့၊ တောင်တော်ကျောင်းတိုက်ရှိ သင်္ကန်းနက်ဘုရား စတဲ့ ရုပ်ပွားတော်မြတ် ၄ ဆူကို မင်းကင်းမြို့တွင်း လှည့်လည်အပူဇော်ခံခဲ့ပြီး ရွှေဂူကျောင်းတော်ကြီး အာရုံခံမှာ ၄ ရက်တိုင်တိုင် အပူဇော်ခံထားရှိပါတယ်။
ဒီဗုဒ္ဓပူဇနိယပွဲတော်က မင်းကင်းမြို့နယ်ရဲ့ အကြီးကျယ်ဆုံးဘုရားပွဲ ဖြစ်ပြီး မင်းကင်းမြို့အပြင် မြို့နယ်တွင်းကျေးရွာတွေကပါ လာရောက်ဖူးမြော်ကြတာလည်း ဖြစ်ပါတယ်။ ဒါ့အပြင် အဝေးရောက် မင်းကင်းမြို့နယ်သူမြို့နယ်သားတွေရဲ့ ပြန်လည်ဆုံတွေ့ကြတဲ့ပွဲလည်း ဖြစ်ပါတယ်။
ဒီပွဲတော်ကာလမှာ ပျော်ပွဲရွှင်ပွဲတွေ၊ ဈေးရောင်းပွဲတွေအပြင် ရိုးရာလောင်းလှေပြိုင်ပွဲတွေကိုလည်း ထည့်သွင်းကျင်းပကြပါတယ်။ ဒီဘုရားပွဲတော်ကို အလောင်းစည်သူမင်းလက်ထက်ကတည်းက နှစ်စဉ်ရိုးရာမပျက် ကျင်းပလာခဲ့တာ ဖြစ်တယ်လို့ သိရပါတယ်။
