ဘောလိဝုဒ်စတား မင်းသား ၂ လက် အပြိုင်ကြဲသရုပ်ဆောင်ထားကြတဲ့ အက်ရှင် ဇာတ်ကြမ်းရုပ်ရှင်-War ဟာ ရုံတင်ပြသတဲ့ ပထမနေ့မှာတင် ဝင်ငွေရူပီး ၅၃၃ ဒဿမ ၅ သန်းရရှိခဲ့ပြီး စံချိန်ချိုးခဲ့ပါတယ်။
Yash Raj Films ရုပ်ရှင်ထုတ်လုပ်ရေးက တင်ဆက်လိုက်တဲ့ ဒီရုပ်ရှင်ကားကိုတော့ အိန္ဒိယရုပ်ရှင်ဒါရိုက်တာ Siddharth Anand က ရိုက်ကူးပုံဖော်ပေးထားတာ ဖြစ်ပါတယ်။
ဒီကားထဲမှာတော့ မြန်မာပရိသတ်တွေက လက်ပွားမင်းသားလို့ သိထားကြတဲ့ ထိပ်တန်း ဟောလိဝုဒ်သရုပ်ဆောင်မင်းသား Hrithik Roshan နဲ့ နာမည်ကျော် Baaghi ရုပ်ရှင်ဇာတ်ကားတွေနဲ့ လူသိများတဲ့ သရုပ်ဆောင်မင်းသား Tiger Shroff တို့နဲ့အတူ သရုပ်ဆောင်မင်းသမီး Vaani Kapoor တို့က ပါဝင်ထားကြတာ ဖြစ်ပါတယ်။
ဆရာတပည့် ၂ ဦးဖြစ်ခဲ့ဖူးကြတဲ့ ဟီးရိုးနှစ်ယောက်ကြားက အားပြိုင်မှုတွေနဲ့ ယှဉ်ပြိုင်ရင်း ဖြစ်တည်လာတဲ့ စစ်ပွဲတစ်ခုအသွင် အပစ်အခတ်အက်ရှင်ဒရာမာဇာတ်လမ်းတပုဒ်အသွင် ရိုက်ကူးထားတဲ့ ဒီရုပ်ရှင်ကားဟာ ရုံမတင်ခင်ကတည်းက ပရိသတ်တွေကြား စိတ်ဝင်စားမှုတွေ ရှိနေခဲ့တာပါ။
IMDb မှာတော့ ဒီရုပ်ရှင်ကားဟာ Rating 7.4 အထိ ရရှိထားတဲ့ ဇာတ်ကားတကား ဖြစ်ပါတယ်။
ကြာမြင့်ချိန် ၁၅၄ မိနစ်ရှိတဲ့ ဒီရုပ်ရှင်ကားထဲမှာတော့ ဘောလိဝုဒ်ရုပ်ရှင်ကားတွေရဲ့ ထုံးစံအတိုင်း နောက်ခံတေးဂီတနဲ့ ဇာတ်ဝင်တေး ၅ ပုဒ်ထိ ထည့်သွင်းထားခဲ့တာပါ။
ဒီကားကိုတော့ မြန်မာနိုင်ငံမှာ အောက်တိုဘာလ ၃ ရက်နေ့က စတင်ပြီး ရုံတင်ပြသနေပါတယ်။
