ဝက်လက်မြို့နယ်တွင် ဆရာ၊ဆရာမ မလုံလောက်သဖြင့် ကျောင်းသားများ အခက်ကြုံနေ

စစ်ကိုင်းတိုင်း၊ ဝက်လက်မြို့နယ်၊ ယင်းမတောကျေးရွာမှာ အခြေခံပညာ မူလတန်းကနေ မူလတန်းလွန်ကျောင်းအဖြစ် အခုနှစ်မှာ အဆင့်တိုးမြှင့် ပေးထားပေမယ့် ဆရာ ဆရာမ မလုံလောက်လို့ ကျောင်းသားကျောင်းသူ ၈၀ ကျော်ဟာ ပညာသင်ကြားရာမှာ အခက်ကြုံနေ တယ်လို့ ဒေသခံတွေဆီကသိရပါတယ်။
အဆိုပါကျောင်းမှာ KG တန်းကနေ ဆဋ္ဌမတန်းအထိ သင်ပေးနေရတာဖြစ်ပေမယ့် အစိုးရခန့် ဆရာမ ၄ ဦးနဲ့ ရွာကငှားထားတဲ့ဆရာမ ၂ ဦး စုစုပေါင်းမှ ဆရာမ ၆ ဦးပဲရှိတယ်လို့ ကျောင်းအုပ်ဆရာမဆီက သိရပါတယ်။
“စနစ်သစ်သင်ကြားမှုပုံစံနဲ့က ဆရာ/ဆရာမ အင်အားပြည့်စုံမှ ကလေးတွေအတွက် သင်ကြားရေးမှာ ထိရောက်အောင်မြင်မှာပါ” လို့ ကျောင်းအုပ်ဆရာမဒေါ်မာရွှေကပြောပါတယ်။
ဆရာ ဆရာမ ပြည့်စုံအောင်ခန့်ထားနိုင်ရေး မြို့နယ်ပညာရေးမှူးရုံးကို မေးမြန်းရာမှာတော့ မြို့နယ် ဒု ပညာရေးမှူး ဦးဝင်းအုပ်က “ဆရာ/ဆရာမ ခန့်ထားရေးက တိုင်းပညာရေးမှူးရုံးက လုပ်တာဖြစ်လို့ ကျနော်တို့အနေနဲ့ ကတော့ လိုအပ်ချက်တွေကိုပဲတင်ပြတောင်းခံရတာပါ”လို့ ပြောပါတယ်။
ယင်းမတောရွာသား ဦးသန်းအောင်က “ဟိုအတန်းပြေးရ ဒီအတန်းပြေးရ မောနေအောင် သင်ပေးနေရတာဆိုတော့ ဆရာမလေးတယောက်ဆို ငိုယူရတယ်။ ဒါနဲ့ဆရာမရယ် ကျနော်တို့ အတတ်နိုင်ဆုံကြိုးစာပြီး အထက်ကို တင်ပြကြည့်ပါအုံးမယ်လို့ ပြောထားရတာ”လို့ ပြောပါတယ်။
ဝက်လက်မြို့နယ်အတွင်းမှာ မူလတန်းကျောင်းသား/သူ ၁၆၆၄၆ ဦး၊ အလယ်တန်း ကျောင်းသား/သူ ၁၁၀၉၀ ဦးနဲ့ အထက်တန်း ကျောင်းသား/သူ ၃၄၁၆ ဦး စုစုပေါင်း ကျောင်းသားကျောင်သူပေါင်း ၃၁၁၅၂ ဦးရှိပြီး ဆရာ ဆရာမ စုစုပေါင်းကတော့ ၁၇၈၆ ယောက်နဲ့ နေ့စားဆရာမ ၁၈ ယောက်ရှိတယ်လို့ မြို့နယ်ပညာရေးမှူးရုံးကသိရပါတယ်။။
သတင်း- အောင်စံလင်း











