ကြံ့ခိုင်ရေးပါတီ အာဏာရပါက မယ်ခွေ၏ “လက်ဆောင်”ကဗျာကို ပြန်လည်ပြဋ္ဌာန်းပေးမည်

အဋ္ဌမတန်း မြန်မာစာ သင်ရိုးညွှန်းတမ်းကနေဖယ်ရှားခဲ့တဲ့ မယ်ခွေရဲ့ လက်ဆောင်ကဗျာ ကို အာဏာရချိန်မှာ ပြန်လည် ပြဋ္ဌာန်းပေးမယ်လုိ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးတိုးတက်ရေးပါတီက ကတိပေး ပြောကြားလိုက်ပါတယ်။
ကြံ့ခိုင်ရေး ပါတီဥက္ကဋ္ဌ ဦးသန်းဌေးက “ပြန်ပြီး ပြင်ခြင်းမပြင်ခြင်းသည် လုပ်ပိုင်ခွင့်ရှိသော ပုဂ္ဂိုလ်များရဲ့ အကြောင်းအရာသာ ဖြစ်တော့တယ်။ သူတို့ လုပ်သည်ဖြစ်စေ၊ မလုပ်သည်ဖြစ်စေ နောက်ထပ် မသိချင်ယောင်ဆောင်ပြီး နောက်တနှစ် ထပ်ဆွဲပြီးတော့ ဒီထဲကနေ ဖယ်ထားသည်ဖြစ်စေ ကျနော်တို့ ကာလကျရင် ပြန်ပြီးတော့ ပြဋ္ဌာန်းပေးမယ့်ကိစ္စဖြစ်တယ်လို့ ကတိပေးပါတယ်ဗျာ”လို့ ပြောပါတယ်။
လက်ဆောင်ကဗျာကို လူတဦးတယောက်ရဲ့ စိတ်ကူးနဲ့ တင်ပြမှုကို လွယ်လွယ်ကူကူ သင်ရိုးညွှန်းတမ်းကနေ ဖျက်ခဲ့တာဖြစ်တဲ့အတွက် အစိုးရအနေနဲ့ တာဝန်ယူဖြေရှင်းရမယ့် အချက်ဖြစ်တယ်လို့လည်း ဆိုပါတယ်။
ကြံ့ခိုင်ရေးပါတီရဲ့ ဥက္ကဋ္ဌက ဇွန်လ ၁၁ ရက်က နေပြည်တော်၊ ဇေယျာသီရိမြို့နယ်မှာ ကျင်းပတဲ့ လူထုတွေ့ဆုံပွဲနဲ့ လေဘေးသင့်ပြည်သူတွေကို ထောက်ပံ့တဲ့ အခမ်းအနားအပြီးမှာ ဖြေကြားခဲ့တာပါ။











