မနေ့က ရန်ကုန်တိုင်း မင်္ဂလာဒုံမြို့နယ်မှာ အိမ်တအိမ်ကို ရဲတပ်ဖွဲ့က မူးယစ်ဆေးဝါးသတင်းအရ ဝင်ရောက်ရှာဖွေရာမှာ ရန်ပြုလို့ ပစ်ခတ်ခဲ့ရပြီး တယောက်သေ၊ တယောက်ဒဏ်ရာရခဲ့ပါတယ်။
မေလ ၂၅ ရက် နေ့လယ် ၂ နာရီအချိန်က ရဲအုပ် သန်းပိုင်ဦး ဦးစီးတဲ့ ပူးပေါင်းအဖွဲ့ဟာ မင်္ဂလာဒုံမြို့နယ်၊ (၃/ခ)ရပ်ကွက်နေ အသက် ၄၈ နှစ်အရွယ် ဦးဖိုးလမ်း(ခ)ဝင်းမင်းထွေးရဲ့ အိမ်ကို မူးယစ်ဆေးဝါးသတင်းအရ ဝင်ရောက်ရှာဖွေရာမှာ ခြံတံခါးဖွင့်မပေးတာကြောင့် ကျော်နင်း ဝင်ရောက်ခဲ့ကြပါတယ်။
ဒီလိုဝင်ရောက်တုန်းမှာ ဦးဖိုးလမ်း(ခ)ဝင်းမင်းထွေးနဲ့ သူ့ရဲ့သား အသက် ၂၁ နှစ်အရွယ် လင်းမာန်ဦးတို့က ဓားရှည်တွေ ကိုယ်စီကိုင်ပြီး ရန်ပြုလာခဲ့တာကြောင့် ပါလာတဲ့ ရဲတပ်သားက MA-13 သေနတ်နဲ့ ၄ ချက် သတိပေးပစ်ခတ်ခဲ့တယ်လို့ ဆိုပါတယ်။
ဒါကြောင့် ဦးဖိုးလမ်း(ခ)ဝင်းမင်းထွေးမှာ ညာလက်မောင်းနဲ့ ပေါင်မှာ ကျည်ဖောက်ဝင် ဒဏ်ရာရခဲ့ပြီး လင်းမာန်ဦးမှာတော့ ညာနို့အုံအထက်နဲ့ ဘယ်နောက်ကျောနံရိုးအောက်မှာ ကျည်ဖောက်ဝင်ဒဏ်ရာ ၂ ချက်ရပြီးသေဆုံးခဲ့ပါတယ်။
သူတို့ရဲ့ အိမ်ကို ရှာဖွေရာမှာတော့ မူးယစ်ဆေးဝါးသုံးစွဲဖို့ ရောက်နေတဲ့ အသက် ၁၉ နှစ်အရွယ် ကျော်နန္ဒနဲ့ စိတ်ကြွဆေးပြား ၅၆ ပြား၊ ဓားရှည်မျိုးစုံ ၁၀ ချောင်း၊ သံလက်သီးစွပ် ၂ ခု၊ လှံ ၁ ချောင်း၊ လေပစ္စတိုသေနတ် ၁ လက်၊ သံ/ကော်ဘောစေ့ ၈၇ လုံး၊ သံတုတ် ၂ ချောင်းတို့ကို သိမ်းဆည်းရမိခဲ့ပါတယ်။
ဒါကြောင့် ဦးဖိုးလမ်း(ခ)ဝင်းမင်းထွေး အပါအဝင် ၃ ယောက်ကို မင်္ဂလာဒုံရဲစခန်းမှာ အမှုအသီးသီးရေးဖွင့်စစ်ဆေးနေပြီး မူးယစ်ဆေးဝါးကွင်းဆက်တရားခံ ဖမ်းဆီးရမိရေးလည်း ဆောင်ရွက်နေတယ်လို့ ရဲတပ်ဖွဲ့က ထုတ်ပြန်ထားပါတယ်။
