ဗြိတိန်ဝန်ကြီးချုပ် အန်ဒီဘန်နမ်က ဝက်စ် စထရိတင်းကို ကာကွယ်ရေးဝန်ကြီး၊ မီယာတာ ဖန်ဘူလာ ကို စွမ်းအင်လုံခြုံရေးဝန်ကြီးအဖြစ် ခန့်အပ်ခဲ့တယ်လို့ ဝန်ကြီးချုပ်ရုံးက ဇူလိုင် ၂၀ ရက်မှာ ပြောပါတယ်။

ဗြိတိန် ဘဏ္ဍာရေးဝန်ကြီး ရေချယ်ရိဗ်စ်ကတော့ ဇူလိုင် ၂၀ ရက်မှာ အစိုးရအဖွဲ့ထဲကနေ ထွက်သွားခဲ့ပါတယ်။

ရေချယ်ရိဗ်စ်က “ကျမရဲ့ ဆက်ခံသူ အန်ဒီနဲ့ သူ့ရဲ့အစိုးရအဖွဲ့အတွက် အကောင်းဆုံးဖြစ်ပါစေလို့ ဆုတောင်းပါတယ်။ ရှင်တို့မှာ ကျမရဲ့ထောက်ခံမှုကို အပြည့်အဝ ရထားပြီး ဒီ လေဘာအစိုးရအနေနဲ့ နိုင်ငံအတွက် လိုအပ်တဲ့ ပြောင်းလဲမှုကို ပေးအပ်ရာမှာ ကျမရဲ့အခန်းကဏ္ဍကနေ ဆက်ပါဝင်သွားမှာပါ” လို့ X လူမှုကွန်ရက်ပေါ်ကနေ ပြောခဲ့ပါတယ်။

အဲဒီနေ့မှာပဲ ဗြိတိန်ကာကွယ်ရေးဝန်ကြီးဟောင်း ဂျွန်ဟီလီကို ဘဏ္ဍာရေးဝန်ကြီးအဖြစ် ခန့်အပ်ခဲ့တယ်လို့ အစိုးရက ပြောပါတယ်။

အသက် ၆၆ နှစ်အရွယ် ဟီလီက သူ့စစ်တပ်မှာ လုံလောက်တဲ့ ငွေရင်းနှီးမြှုပ်နှံဖို့ ပျက်ကွက်ပြီး အန္တရာယ်များတဲ့ ကမ္ဘာမှာ နိုင်ငံကို ကာကွယ်ဖို့ လိုအပ်တဲ့ အရာတွေကို အလွန်နည်းပါးစေခဲ့တယ်လို့ စွပ်စွဲပြီးတဲ့နောက် ပြီးခဲ့တဲ့လက ကီယာစတာမာရဲ့ အစိုးရကနေ နုတ်ထွက်ခဲ့ပါတယ်။

လူကြိုက်များတဲ့ လေဘာပါတီဝင်ဟောင်း ဟီလီဟာ အဓိကဘဏ္ဍာရေးရာထူးအတွက် ဖြစ်နိုင်ခြေရှိတဲ့ ကိုယ်စားလှယ်လောင်းအဖြစ် ရှုမြင်မခံရပေမဲ့ ၂၀၀၂ ခုနှစ်ကနေ ၂၀၀၇ ခုနှစ်အထိ ဘဏ္ဍာရေးဌာနမှာ အငယ်တန်းဝန်ကြီးအဖြစ် တာဝန်ထမ်းဆောင်ခဲ့ဖူးပါတယ်။

ခုတော့ သူဟာ ဘန်နမ်အစိုးရလက်ထက်မှာ ကာကွယ်ရေးအတွက် သုံးဖို့ ငွေပိုရှာနိုင်ရေး ကူညီပေးရမှာ ဖြစ်ပါတယ်။

ရှာဘာနာမာမွတ်ကိုတော့ ပြည်ထဲရေးဝန်ကြီးအဖြစ် ပြန်ခန့်အပ်ခဲ့တယ်လို့ ဝန်ကြီးချုပ်ရုံးက ပြောပါတယ်။

အက်ဒ် မီလီဘန်းကိုတော့ နိုင်ငံခြားရေးဝန်ကြီးအသစ်အဖြစ် ကြေညာခဲ့ပါတယ်။ ရွေးကောက်ပွဲမတိုင်မီက မီလီဘန်းဟာ ဗြိတိန်ရဲ့ အဖိုးတန်ပေမဲ့ ကုန်ကျစရိတ်များတဲ့ အမျိုးသားကျန်းမာရေးဝန်ဆောင်မှု (NHS) ကို သူ့ရဲ့ မဲဆွယ်စည်းရုံးရေး အဓိကအချက်တခုအဖြစ် သုံးခဲ့ပါတယ်။

Source: Reuters