ကယားပြည်နယ်၊ ဒီးမော့ဆိုမြို့နယ်မှာ ကျေးရွာပေါင်း ၂၂ ရွာလောက် ရေရှားပါးမှုနဲ့ ကြုံတွေ့နေရတယ်လို့ ဒေသခံရွာသားတွေက ပြောပါတယ်။

ဒေါတမကြီးကျေးရွာအုပ်စုမှာဆိုရင် ရေလှူဒါန်းပေးမှသာ အဆင်ပြေနိုင်မယ်လို့ ဒေသခံ ဦးဇဲကပြောပါတယ်။

“အရင်တုန်းက အန်ဂျီအို ရေလှောင်ကန်လာတုန်းကဆိုရင် ရွာထဲမှာ ခပ်လို့ရတယ်။ အခုက မလာတော့ဘူး။ တွင်းရေပဲ သွားခပ်ခပ်နေရတယ်။ တွင်းရေကလည်း အနက်ကြီးပဲ တောင်ခြေမှာသွားရတယ်။ မနက်ခပ်ရင် ကုန်ကုန်သွားတယ်။ သွားစောင့်ခပ်ရတာပေါ့။ ရေက အနက်ကြီးပဲ”

ရေခန်းခြောက်ပြီး သောက်သုံးရေအခက်အခဲဖြစ်နေတဲ့ ရွာတွေကို အစိုးရနဲ့ ပရဟိတ အဖွဲ့တွေက ရေကားတွေနဲ့ လာရောက်လှူဒါန်းပေးတာတွေ ရှိပေမယ့်မလောက်ငတ်ဘူးလို့လည်း ဒေါညေးခူကျေးရွာက ကျောင်းထိုင်ဆရာတော် ဦးစန္ဒ၀ရက မိန့်ပါတယ်။

“ဒီသင်္ကြန်မတိုင်ခင်ကဆိုရင် ရေနည်းနည်းလေးတော့ရှိတာပေါ့။ နည်းနည်းဆိုတာ စောင့်ပြီးခပ်ရတာပေါ့လေ။ အခုနောက်ပိုင်းကျတော့ တွင်းရေတွေက အကုန်ခမ်းကုန်ပြီလေ။ နေကလည်း တအားပူတာကို။ အခုတခါတလေကျတော့ ရွှေလွိုင်ကော် (ပရဟိတ) တို့ဘာတို့ကတော့ လာလှူတယ်။ လာလှူတယ်ဆိုပေမယ့် သူက နေ့တိုင်းမလာနိုင်ဘူးလေ။ သူတို့လည်း။ တခါလာပြီဆိုရင်လည်း အိမ်ပေါက်စေ့တော့ အကုန်မရဘူးပေါ့။ ”

ပြီးခဲ့တဲ့နှစ်တွေတုန်းက ACF ဆိုတဲ့ အန်ဂျီအိုအဖွဲ့အစည်းတွေက ချောင်းရေကနေ တဆင့် ရေပိုက်တွေ သွယ်တန်းပေးတာရှိပေမယ့် အခု အဲဒီကနေ ရေမလာတော့သလို ပြီးခဲ့တဲ့နှစ်ကလည်း အစိုးရကနေပြီး ပြည်နယ်ဘတ်ဂျက်နဲ့ ပိုက်တွေသွယ်ထားပေးတာရှိပေမယ့် မိုးတွင်းတုန်းက တောင်ကျရေကြောင့် ပိုက်တွေ အကုန်ပျက်စီးကုန်တဲ့အတွက် ရေမရတော့ဘူးလို့ ဆရာတော်က မိန့်ပါတယ်။

ဒါကြောင့် လတ်တလော ဒေသခံတွေက ရေအလှူကိုသာ အားကိုးနေကြရတာ ဖြစ်ပါတယ်။

ဒီးမော့ဆိုမြို့နယ် အုပ်ချုပ်ရေးမှူး ဦးဉာဏ်လှိုင်ကတော့ ဒီးမောဆိုမြို့နယ်မှာ ကျေးရွာအုပ်စု ၉ စု၊ ကျေးရွာပေါင်း ၂၂ ရွာမှာ  နှစ်စဉ် ရေရှားပါးနေပြီး မြို့နယ်အနေနဲ့ ရေလှူဒါန်းတာတွေရှိတယ်လို့ ပြောပါတယ်။

“ကျနော်တို့ဆီက တဖွဲ့၊ ဘေးစီမံက တဖွဲ့၊ မီးသတ်က တဖွဲ့၊ နေ့စဉ်ပဲ ရွာတွေကို ရေအရောက်ပို့ပေးတယ်။ သူတို့ရွာတွေမှာရှိတဲ့ တလစာလည်း ပိုက်ဆံထုတ်ပေးထားတယ်။ စောစာပိုင်းက ပိုက်ဆံမရှိသေးလို့၊ ၁၃ ရက်နေ့ကစပြီးတော့ ပိုက်ဆံရတယ်။ အဲဒီ ပိုက်ဆံတခါတည်းပေးထားတော့ ရေမရှားတော့ဘူးနော်။”

ဒီးမော့ဆိုမြို့နယ်မှာ ရေထွက်ရှိပေမယ့် ရေသွားသယ်ဖို့ ဝေလံတဲ့အတွက် ဒေသခံတွေ အတွက် ရေရှားတာလို့လည်း အုပ်ချုပ်ရေးမှူးက ပြောပါတယ်။

“ဒီးမော့ဆိုမြို့နယ်မှာ ရေထွက်ရှိတယ်။ ဒေါတမကြီးလည်း ရေထွက်ရှိတယ်။ လွီးကထိ မှာလည်း ရေထွက်ရှိတယ်။ နောက်ပြီး ဒီဘက်က ရေထွက်ရတဲ့နေရာ ၆ နေရာလောက်က ရှိသေးတယ်။ အဲဒီရေထွက်ကနေ သယ်လို့ရတယ်။ သူတို့က ဒါပေမယ့် အဲဒီနေရာအထိ သွားပြီး သယ်မယ့် အလုပ်ကို သူတို့မလုပ်ချင်တာ။ အိမ်ထဲမှာ မိုးရေလောက်ကို မိုးပေါ်ကျလာတဲ့ရေ မရှိတဲ့အတွက် ရေရှားတယ်လို့ပြောကြတာ။ အမှန်က ရေရှားတာက အဲလိုပြောတာမဟုတ်ဘူး။ ကျနော်တို့ အညာဘက်က ရေရှားတယ်ဆိုတာရေလုံးဝ မရှိမှ ရေရှားတာလေ။ အခုက ရေလုံးဝမရှိတာမဟုတ်ဘူး။ မိုးပေါ်က ကျလာတဲ့ရေမရှိတာကို သူတို့က ပြောတာ။”

ရေရှားပါးတဲ့ ကျေးရွာတွေကိုတော့ ရွှေလွှိုင်ကော်ပရဟိတအဖွဲ့ကလည်း ရေတွေ သွားရောက်ပို့ဆောင် လှူဒါန်းပေးနေပါတယ်။