စစ်ကိုင်းတိုင်းဒေသကြီး၊ ဝက်လက်မြို့နယ်အတွင်းက ကျေးရွာတချို့မှာ နေပူရှိန် မြင့်မား ရေတွင်းရေကန်တွေ ခမ်းခြောက်ပြီး သောက်ရေ ရှားပါးမှုနဲ့ ကြုံတွေ့နေရတယ်လို့ ဒေသခံတွေက ပြောပါတယ်။
ဝက်လက်မြို့နယ်အတွင်းမှာ ကျေးရွာပေါင်း ၂၃၄ ရွာရှိတဲ့အနက် ဝက်လက်မြို့နယ်အရှေ့ခြမ်းက ကျေးရွာတွေကမှာ အဓိက သောက်ရေရှားပါးနေတာ ဖြစ်ပါတယ်။
ဝက်လက်ဒေသမှာ တကိုယ်တော် ပရဟိတလုပ်နေသူ ဦးဝင်းအေးက “ဒီ စမွန်းရွာမှာ သောက်ရေခက်ခဲနေတယ်လို့ ကြားကြားခြင်းလာလှူတာပဲ။ အိမ်ထောင်စု တစုကို၂၀ လီတာရေသန့်ဘူးကြီး တဘူးနှုန်းနဲ့ ဘူး ၁၆၀ လှူတာ” လို့ ပြောပါတယ်။
ဆက်လက်ပြီး သောက်ရေခက်ခဲလို့ ဆက်သွယ်ထားတဲ့ရွာတွေဖြစ်တဲ့ မြင်တော်၊ အရှေ့ရွှေကျင် စတဲ့ရွာတွေကိုလည်း လိုက်လံရေ လှူသွားမယ်လို့လည်း ဆိုပါတယ်။
စမွန်းကျေးရွာ အုပ်ချုပ်ရေးမှူး ဦးထွန်းတင့်က “ကျနော်တို့ရွာမှာ အဝီစိတွင်း တူးထားတာတော့ ရှိတယ်။ ရေငံပဲထွက်တော့ သောက်ရေတော်တော်ခက်ခဲတယ်”လို့ ပြောပါတယ်။
ကျေးလက်ဒေသ ဖွံ့ဖြိုးတိုးတက်ရေးဦးစီးဌာနအနေနဲ့ ဟံလင်းတောင်ပိုင်း ၅ ရွာ၊ ဘုရားလေးကုန်း၊ နတ်ကုန်း၊ အရှေ့ရွှေကျင် စတဲ့ ၄ ရွာကို သောက်ရေ ဝေငှဖို့ အဓိက စီစဉ်ထားတာဖြစ်ပေမယ့် အခြားအရေးတကြီးလိုအပ်တဲ့ ရွာတွေရှိခဲ့ရင်လည်း အကြောင်းကြား ကြဖို့ ဖုန်းနံပါတ်တွေ ပေးထားတယ်လို့ သိရပါတယ်။
ကျေးလက်ဒေသဖွံ့ဖြိုးတိုးတက်ရေး ဦးစီးဌာန မြို့နယ်ဦးစီးမှူး ဦးအောင်လွင်ဦး က “ကျနော်တို့ဌာန အနေနဲ့ကတော့ လာမယ့် သောကြာနေ့ ကစပြီး သောက်ရေလိုအပ်တဲ့ နေရာတွေကို အလှည့်ကျ ဝေငှသွားမှာပါ”လို့ ပြောပါတယ်။
ကျေးလက်ဒေသဖွံ့ဖြိုးရေးတိုးတက်ရေး ဦးစီးဌာနအနေနဲ့ပြီးခဲ့တဲ့ ၇ နှစ်တာကာလအတွင်း ယူနီဆက်ဖ်အဖွဲ့နဲ့ ပူးပေါင်းပြီး ကျေးရွာ ၁၀ရွာမှာ အဝီစိတွင်း တူးပေးတာ၊ ရွာ ၂၃ ရွာမှာ ပိုက်လိုင်းသွယ်ပေးတာ၊ တွင်းနက် ၅၃ တွင်းနဲ့ မြေသားကန် ၃၁ ကန်တူးပေးတာ၊ မြစ်ရေတင်လုပ်ငန်း ၄ ရွာမှာ ဆောက်ရွက်ပေးတာအပါအ၀င် ရေရှားပါတဲ့ ရွာပေါင်း ၉၀ ကျော် အတွက် ရေတွင်း ရေကန်တွေလုပ်ပေးထားတယ်လို့ ဆိုပါတယ်။
ဒါပေမယ့် နေပူရှိန်မြင့်မားလာတာရယ်၊ မိုးရွာသွန်းမှု နည်းလာတာရယ်ကြောင့် သောက်ရေကန်တွေ စောစောစီးစီး ခမ်းခြောက်လို့ ရေအခက်အခဲဖြစ်ရတာလို့ ကျေးလက်ဒေသ ဖွံ့ဖြိုးတိုးတက်ရေးဦးစီးဌာနက ပြောပါတယ်။
သတင်း- အောင်စံလင်း
