ရခိုင်ပြည်နယ် ဘူးသီးတောင်မြို့နယ် စံဂိုးတောင်ကျေးရွာအုပ်စု ဆင်သေပြင်ဘင်္ဂါလီရွာမှာ ဧပြီလ ၂၁ ရက် နေ့လယ် ၂ နာရီလောက်က ကိုယ်ဝန်ဆောင် အမျိုးသမီးတဦးရဲ့ ဝမ်းဗိုက်ကို ကျည်ထိမှန်ပြီး ဘူးသီးတောင်ဆေးရုံမှာ ဆေးကုသမူခံယူနေရာမှ ကလေးငယ် သေဆုံးသွားတယ်လို့ သိရပါတယ်။
မိခင်ဖြစ်သူမှာလည်း အူပေါက်သွားကာ အသက်အန္တရာယ်စိုးရိမ်ရတဲ့ အနေအထား ရှိနေတယ်လို့ ဆက်သေပြင်ကျေးရွာမှ ရွာလူကြီး မူယာမတ်မာမတ်ဆော်လိမ်က ပြောပါတယ်။
"နေ့လယ် ၂ နာရီ နဲ့ မိနှစ် ၂၀ လောက်မှာ ကျည်ထိတာ ဗိုက်မှာထိမှန်တာပါ။ သူမက ဗိုက်ကြီးသည်ပါ။ သူမက အိမ်ထဲမှာနေပြီး သေနတ်ကျည်က လာထိမှန်တာပါ။ တိုက်ပွဲဖြစ်တာတော့ မဟုတ်ဘူး။ မနက်ကတည်းက လက်နက်ကြီး လက်နက်ငယ်သံတွေ ဆင်သေပြင်နဲ့ ဥယျာဉ်သာကြားမှာ ပစ်ခတ်နေကြတာပါ။ အေအေ အဖွဲ့နဲ့ ဖြစ်တာလား၊ တပ်ကပဲ ပစ်နေတာလား၊ ကျနော်တို့လည်း သွားမကြည့်နိုင်ပါ၊ အသံတွေ ကြားနေရုံလောက်ပါ။ နောက်လူတွေတော ထိခိုက်တာမရှိပါဘူး။ မနေ့ညက ဗိုက်ထဲက ကလေးငယ်သေဆုံးသွားပြီး ခွဲစိတ်ထုတ်လိုက်ရတယ်လို့ သိရပါတယ်။ မိခင်မှာ အူပေါက်ထွက်သွားပါတယ်။ အရေးပေါ်သွေးတွေ သွင်းထားရတယ်လို့ သိရပါတယ်။ မိခင်လည်း အသက်အန္တရယ် စိုးရိမ်ရတယ်” လို့ပြောကြားပါတယ်။
ဝမ်းဗိုက်မှာ ကျည်ထိမှန်တဲ့ ဗိုက်ကြီးသည်မှာ မဆောနှရ်ရာ ၂၇ နှစ် ဖြစ်ပြီး သားသမီး ၃ ဦး ရှိတယ်လို့ သိရပါတယ်။
ဖြစ်စဉ်နဲ့ပတ်သက်ပြီး အနောက်ပိုင်းတိုင်းစစ်ဌာနချုပ်မှ ဗိုလ်မှူးကြီး ၀င်းဇော်ဦးက "ထိတွေတိုက်ပွဲဖြစ်တာက ဆင်သေပြင်ကျေးရွာနဲ့ အဝေးကြီးပါ။ တိုက်ပွဲဖြစ်တာက ရှိတယ်။ အောင်သာချောင်းနားမှာ ဖြစ်တာရှိတယ်။ ဗိုက်ကြီးသည်ထိတာလည်း မသိပါဘူး။ ဆင်သေပြင်နဲ့ အောင်သာချောင်းနဲ့က မီတာ ၂၀၀၀ လောက်ဝေးပါတယ်။ ကျနော်တို့က နယ်မြေရှင်းလင်း နေတယ်။ အေအေ ရှိတယ်ဆိုရင် တိုက်ပွဲဖြစ်မှာပါပဲ။ နယ်မြေရှင်းလင်းတဲ့အခါမှာ လက်နက်ကြီး ပစ်ကူပေးဖို့လိုတယ်ဆိုရင် လက်နက်ကြီးပစ်ကူပေးရတယ်။ လက်နက်ကြီးပစ်ကူပေးတာလည်း တောထဲကိုသာ ပစ်တာရှိတယ်။ ရွာနဲ့ အနီးဝန်းကျင်တို့ကို မပစ်ပါဘူး။ မြောက်ဦးက နခခ ၃၁ တိုက်ခိုက်ခံရတုန်းကဆို ကျေးရွာတွေထဲကို လက်နက်ကြီးပစ်လို့ရတယ်။ ရန်သူက အိမ်ကြို အိမ်ကြားတွေက ပုန်းခိုပြီး ပစ်နေတာလေ။ ပစ်ချင်တာလက်ကို ယားနေတာပါပဲ၊ ဒါပေမယ့် ပြည်သူလူထုကို ထိမှန်မှာစိုးလိုသာ ပစ်ခတ်မှု မပြုခဲ့တာပါ။ တောထဲမှာဆိုတော့ လက်နက်ကြီး ပစ်ကူသင့်ရင် ပစ်ကူနေရတာပါပဲ။ အခုဆင်သေပြင် ကိစ္စကလည်း ၀ါဒဖြန့်တာပဲ ဖြစ်နိုင်ပါတယ်။"
လက်နက်ကြီးတွေနဲ့ အဆက်မပြတ်ပစ်ခတ်နေတာကြောင့် ဘူးသီးတောင်မြို့နယ် တောင်ပိုင်း ရခိုင်ကျေးရွာတွေဖြစ်တဲ့ ဥယျာဉ်သာရွာ၊ စံဂိုးထောင်ရွာ၊ နွားရုံတောင်ရွာတွေအပြင် ဘဂါင်္လီကျေးရွာတွေဖြစ်တဲ့ ဆင်သေပြင်၊ ထိပ်တူးပေါက်၊ အာဘူရွာတွေက ပြည်သူတွေဟာ နီးစပ်ရာကျေးရွာတွေရှိ ဆွေမျိုးတွေနဲ့ စစ်ဘေးရှောင်စခန်းတွေမှာ ထွက်ပြေးခိုလှုံနေကြရပါတယ်။
ဧပြီ ၄ ရက်နေ့ နေ့လယ် ၃ နာရီကျော်လောက်ကလည်း စိုင်းဒင်ချောင်းအနီးက အေအေ တပ်ဖွဲ့ကို လေကြောင်းက ပစ်ခတ်နှိမ်နင်းရာမှာ အေအေနဲ့အတူရှိနေတဲ့ သရက်ပြင်၊ ဒဖြူချောင်း၊ ကင်းတောင်၊ ထိပ်တူးပေါက်နဲ့ ဖုန်ညိုလိပ်ကျေးရွာတွေက ဘင်္ဂါလီ ၆ ဦး သေဆုံးခဲ့ပြီး ၉ ဦးထိခိုက် ဒဏ်ရာရရှိခဲ့တယ်လို့ တပ်မတော်ကာကွယ်ရေးဦးစီးဌာနရုံးက တရားဝင်သတင်းထုတ်ပြန်ထားပါတယ်။
တပ်မတော်နဲ့ အေအေ တိုက်ပွဲတွေကြောင့် ရခိုင်ပြည်နယ် ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ရသေ့တောင်၊ ဘူးသီးတောင်၊ မောင်တော စတဲ့မြို့နယ် ၇ ခုမှာ စစ်ဘေးသင့် ဒုက္ခသည်ဦးရေ ၃ သောင်းကျော် ရှိနေပြီလို့ သိရပါတယ်။
ဗညား
