ရုရှားနိုင်ငံ ရောက်ရှိနေတဲ့ ဗိုလ်ချုပ်မှူးကြီး မင်းအောင်လှိုင်ဟာ ၈ ကြိမ်မြောက် မော်စကိုနိုင်ငံတကာလုံခြုံရေးဆိုင်ရာညီလာခံ တက်ရောက်မယ်လို့ တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်ပါတယ်။

ရုရှားနိုင်ငံ ကာကွယ်ရေးဝန်ကြီး Army General Sergey Kuzhugetovich Shouigu နဲ့ ရုရှား-မြန်မာ စစ်ဘက်နည်းပညာပူးပေါင်းဆောင်ရွက်ရေး ကော်မတီ၏ဖိတ်ကြားချက်အရ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်တဲ့ ချစ်ကြည်ရေးကိုယ်စားလှယ်အဖွဲ့ဟာ  ရုရှားနိုင်ငံ၊ အူလန် အူဒယ်မြို့ကို မနေ့ညနေပိုင်းက ရောက်ရှိခဲ့တာပါ။

တပ်မတော်ကာကွယ်ရေးဦးစီးချုပ်ဟာ ခရီးစဉ်အတွင်း ၈ ကြိမ်မြောက် မော်စကိုနိုင်ငံတကာလုံခြုံရေးဆိုင်ရာညီလာခံ (8th Moscow Conference on International Security) ကို တက်ရောက်မှာပါ။

ဒါ့အပြင့် ရုရှားအစိုးရနဲ့ တပ်မတော်မှအကြီးအကဲတွေနဲ့ တွေ့ဆုံဆွေးနွေးတာ၊ စက်ရုံ၊ အလုပ်ရုံတွေနဲ့အတူ အထင်ကရ နေရာတွေကို လှည့်လည်ကြည့်ရှုလေ့လာတာတွေ ဆောင်ရွက်သွားမယ်လို့ သတင်းမှာ ဖော်ပြထားပါတယ်။

တပ်မတော်ကာကွယ်ရေးဦးစီးချုပ်နဲ့ ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး စိုးထွဋ်၊ ဒုတိယဗိုလ်ချုပ်ကြီး မင်းနိုင်နဲ့ တပ်မတော်အရာရှိကြီးတွေ လိုက်ပါသွားပါတယ်။

၈ ကြိမ်မြောက် မော်စကိုနိုင်ငံတကာလုံခြုံရေးဆိုင်ရာညီလာခံကို ဧပြီ ၂၃ ရက်နေ့ကနေ ၂၅ ရက်နေ့အထိ ကျင်းပမယ်လို့ သိရပါတယ်။