အပစ်အခတ်ရပ်စဲရေးနောက်ပိုင်း အစ္စရေးမြောက်ပိုင်းဆီ ဟစ်ဇ်ဘိုလာတွေက အပြင်းထန်ဆုံး ပစ်ခတ်မှုတွေထဲက တရက်အပြီး မေ ၃၁ ရက်မှာ အစ္စရေး မြောက်ပိုင်းဒေသတချို့မှာ ကျောင်းတွေကို ပိတ်ထားဖို့နဲ့ တခြားကန့်သတ်ချက်တွေ ချမှတ်ဖို့ အစ္စရေးစစ်တပ်က အမိန့်ပေးခဲ့ပါတယ်။

တချိန်တည်းမှာ အစ္စရေးက သူ့တပ်ဖွဲ့တွေဟာ လက်ဘနွန်တောင်ပိုင်းက သမိုင်းဝင် ခရူးဆိတ်ခေတ်က ဘူးဖို့တ် ခံတပ်နဲ့ မဟာဗျူဟာကျတဲ့ တောင်ကြောကို သိမ်းပိုက်နိုင်ခဲ့ပြီး လွန်ခဲ့တဲ့ သီတင်းပတ် ၆ ပတ်ကျော်က အပစ်အခတ်ရပ်စဲရေးနောက်ပိုင်း သိသာထင်ရှားတဲ့ မြေပြင်တိုးတက်မှုတရပ်လို့ ပြောပါတယ်။

စစ်ရေးအရ စစ်ဆင်ရေးဟာ ဘူးဖို့တ်တောင်ကြောကို ထိန်းချုပ်ဖို့နဲ့ ဝါဒီအယ်လ်ဆာ လူကီ ဒေသရဲ့ စစ်ဆင်ရေးကို ထိန်းချုပ်ဖို့ ဖြစ်တဲ့အပြင် ဟစ်ဇ်ဘိုလာ အကြမ်းဖက်အဖွဲ့အစည်းကို ဖြိုခွင်းဖို့နဲ့ အီရန်ရဲ့ လမ်းညွှန်မှုအောက်က တောင်ကြောပေါ်မှာ တည်ဆောက်ထားတဲ့ အကြမ်းဖက် အခြေခံ အဆောက်အအုံတွေကို ဖြိုခွင်းဖို့ အာရုံစိုက်ခဲ့တယ်လို့ ပြောပါတယ်။

အစ္စရေးတပ်ဖွဲ့တွေဟာ လက်ဘနွန်တောင်ပိုင်းက ဟစ်ဇ်ဘိုလာရဲ့ အရေးပါတဲ့ ခံတပ်တခုဖြစ်တဲ့ နာဘာတီယာ ဒေသနားမှာလည်း လှုပ်ရှားနေပြီး “လိုအပ်သလို ထိုးစစ်ဆင်မှုကို တိုးချဲ့ဖို့ အသင့်ရှိနေတယ်” လို့ စစ်တပ်က ပြောခဲ့ပါတယ်။

အစ္စရေးတပ်တွေဟာ လက်ဘနွန်တောင်ပိုင်းကို နှစ် ၂၀ နီးပါး သိမ်းပိုက်ထားချိန်အတွင်း ဘူးဖို့တ်ရဲတိုက်မှာ နေခဲ့ဖူးပါတယ်။

အခုလို ချီတက်လာတာကြောင့် အစ္စရေးတပ်တွေဟာ လက်ဘနွန်တောင်ပိုင်းနဲ့ အစ္စရေးမြောက်ပိုင်း ဒေသအများစုကို အပေါ်စီးကနေ ကြည့်ရှုနိုင်တဲ့ နေရာတခုကို ရခဲ့တာလည်း ဖြစ်ပါတယ်။

ဘူးဖို့တ်ရဲတိုက်ဟာ လက်ဘနွန်တောင်ပိုင်းက သက်တမ်း ၉၀၀ နီးပါးရှိတဲ့ ခံတပ်တခုဖြစ်ပြီး ယူနက်စကိုက ဒေသတွင်း အကောင်းဆုံး ထိန်းသိမ်းထားတဲ့ အလယ်ခေတ် ရဲတိုက်တွေထဲက တခုအဖြစ် ဖော်ပြခဲ့ဖူးပါတယ်။

Source: Reuters