အငြိမ်းစား ဗိုလ်ချုပ်မှူးကြီးသန်းရွှေနဲ့ ဇနီးဒေါ်ကြိုင်ကြိုင်မိသားစုက ရဟန်း၊ ရှင်သာမဏေ၊ သီလရှင်နဲ့ ယောဂီ စုစုပေါင်း ၅၀၀ ကျော်ကို ဗုဒ္ဓသာသနာတော်အတွင်း သွတ်သွင်းချီးမြှောက် အလှူတော် မင်္ဂလာပွဲ ကျင်းပဖို့ ရှိနေပါတယ်။
အလှူတော် မင်္ဂလာပွဲကို ဧပြီလ ၁၂ ရက်နဲ့ ၁၃ ရက်တွေမှာ နေပြည်တော်၊ လယ်ဝေးမြို့နယ်၊ သာဝတ္တိရှိ မဟာပရဟိတဂေဟာ (စမတောင်မှာ) ကျင်းပမှာ ဖြစ်တယ်လို့ ဂေဟာရဲ့ လက်ထောက် ဆရာတော် ဦးရေ၀တက ဒီဗွီဘီကို မိန့်ပါတယ်။
ဧပြီ ၁၂ ရက်နေ့မှာ ရဟန်းခံရှင်ပြုမင်္ဂလာပွဲကျင်းပမှာဖြစ်ပြီး ဧပြီ ၁၃ ရက်မှာတော့ သိမ်ဆင်းလောင်းတာ၊ ဆွမ်းလောင်းတာနဲ့ အလှူတော် ရေစက်သွန်းချတဲ့ အခမ်းအနားတွေ ပြုလုပ်မှာ ဖြစ်ပါတယ်။
ရဟန်းခံရှင်ပြုပွဲမှာ ဗိုလ်ချုပ်မှူးကြီး သန်းရွှေနဲ့ မိသားစုဝင်တွေကတော့ သာသနာ့ ဘောင်ဝင်ကြဖို့ မရှိဘဲ တပ်မတော်သား ၁၀၀ ကျော်လောက်နဲ့ ဂေဟာက ကလေးငယ်တွေ သာသနာ့ဘောင် ၀င်ကြဖို့ ရှိတယ်လို့ ဦးရေ၀တက မိန့်ပါတယ်။
ရဟန်းခံရှင်ပြုပွဲနဲ့ အတူ ၇ ရက်တရားစခန်းပွဲကိုလည်း စမတောင်မှာ ကျင်းပဖို့ ရှိနေတယ်လို့ သိရပါတယ်။
