ပဲခူးတိုင်းအနောက်ခြမ်း၊ ကြို့ပင်ကောက်မြို့နယ် အနောက်ဘက် ကျင်စွယ်ကျေးရွာအနီး ဘော်ဘင်ချောင်းကူးတံတား(ကျင်စွယ်) တံတားမှာ မတ် ၂၂ ရက်နေ့လယ် ၁ နာရီခွဲလောက်က မြေသယ်ကား ဖြတ်ကူးရာက တံတားကျိုးကျခဲ့ပါတယ်။
ကျေးရွာဒေသခံ ကိုကျော်မင်းဦးက "တံတားက ၂၀၁၅ ခုနှစ်ကဆောက်ထားတာ၊ အလျားပေ ၂၀၀ ရှိတယ်။ ကားက မိုးညိုဘက်ကနေပြီး ကျေးရွာတွေကို သဲလာပို့တာဖြစ်မယ်။ တံတားအလယ်လောက်မှာ ကျိုးကျသွားတာ။ ကားပေါ်မှာ လူနှစ်ယောက်ပါတယ်။ အသေအပျောက်တော့မရှိဘူး။ ထိခိုက်ဒဏ်ရာရတာတော့ ရှိတယ်။ အခုဆေးရုံသွားလို့ ရဲတွေလိုက်သွားတယ်။" လို့ ပြောပါတယ်။
ဘော်ဘင်ချောင်းကူး (ကျင်စွယ်) တံတားက ၂၀၁၅ ခုနှစ် ရွေးကောက်ပွဲကာလ မတိုင်ခင် မဆွယ်စည်းရုံးရေးကာလက တည်ဆောက်ခဲ့တာဖြစ်ပြီး သံကူကွန်ကရစ် သစ်သား တံတားဖြစ်ပါတယ်။
တံတားခံနိုင်ဝန်နဲ့ သက်တမ်း ဘယ်လောက်အထိ ခံမယ်လို့ ရေးထားတာမရှိဘူးလို့ ကြို့ပင်ကောက်မြို့ခံတဦးက ပြောပါတယ်။
သတင်း-မေသွယ်
