လူမှုကွန်ရက်ပေါ်မှာ တပ်မတော်အား သိက္ခာကျဆင်းအောင် ပုတ်ခတ်ရေးသားခဲ့တယ်ဆိုပြီး ဆက်သွယ်ရေးပုဒ်မ ၆၆ (ဃ) နဲ့ တရားစွဲဆိုခံခဲ့ရတဲ့ ရွှေဝါရောင် ဆရာတော် ဦးသောဘိတအမှုနဲ့ပတ်သက်လို့ တရားလိုဖြစ်တဲ့ တပ်မတော်အရာရှိတဦးကို ဒီနေ့ စတင်စစ်ဆေးပါတယ်။
ဖေဖော်ဝါရီ ၂၈ ရက်နေ့မှာ အမရပူရမြို့်နယ်တရားရုံးက တရားလိုဖြစ်သူ အလယ်ပိုင်းတိုင်းစစ်ဌာနချုပ်၊ ပြည်သူ့စစ်မှ ဦးစီးအရာရှိ (ပထမတန်း) ဒုဗိုလ်မှူးကြီး မျိုးခိုင်ဝင်းကို စတင်စစ်ဆေးခဲ့တာပါ။
“ကျနော်အနေနဲ့ တခြားဘာမှ ပြောစရာမရှိပါဘူး။ တရားရုံးမှာ တရားဝင်ဖြေကြားထားတဲ့ အတွက် တခြားဖြေစရာမရှိပါဘူး” လို့ ဒုဗိုလ်မှူးကြီး မျိုးခိုင်ဝင်းက ပြောပါတယ်။
ရွှေဝါရောင်ဆရာတော် ဦးသောဘိတ (အလင်္ကာကြယ်)က “ဦးဇင်းပြောနေကြ စကားလေး ရှိတယ်။ ဦးဇင်းပြောတဲ့ အကြောင်း အကျိုးနဲ့ဝေဖန်မှုတွေကို တပ်မတော်က အကြောင်းအကျိုးနဲ့ ပြန်ရှင်းနိုင်ဖို့လိုတယ်၊ အဲလို အကြောင်းအကျိုးနဲ့ ဝေဖန်ခဲ့တာကို တရားစွဲဆိုခဲ့တာဟာ တပ်မတော်ရဲ့ အင်မတန်နစ်နာတဲ့ ဂုဏ်သိက္ခာဖြစ်တယ်” လို့ မိန့်ကြားခဲ့ပါတယ်။
အမရပူရမြို့နယ် ဆင်စွယ်ပွတ်ရပ်ကွက်က မဟာဂန္ဓာရုံကျောင်းတိုက်မှာသီတင်းသုံးနေတဲ့ ဆရာတော် ဦးသောဘိတ (အလင်္ကာကြယ်) ဟာ လူမှုကွန်ရက်စာမျက်ပေါ်မှာ ၂၀၁၈ စက်တင်ဘာ ၉ ရက်နေ့က စေတနာတွေ မှန်ကန်ဖို့လိုပါတယ်။ ခေါင်းစဉ်နဲ့ အလယ်ပိုင်းတိုင်း စစ်ဌာနချုပ် နယ်လှည့်ဆေးကုသရေးအဖွဲ့ရဲ့ ဆေးကုသမှုနဲ့ ပတ်သက်ပြီး ရေးသားခဲ့တာပါ။
ဒါကြောင့် ရွှေဝါရောင် ဆရာတော် ဦးသောဘိတ (အလင်္ကာကြယ်) ကို တပ်မတော်နဲ့ တပ်မတော်သားတွေအပေါ် ဂုဏ်သိက္ခာထိခိုက်သည်လို့ဆိုကာ အလယ်ပိုင်းတိုင်းစစ်ဌာနချုပ်၊ ပြည်သူ့စစ်မှ ဦးစီးအရာရှိ(ပထမတန်း) ဒုဗိုလ်မှူးကြီး မျိုးခိုင်ဝင်းက အမရပူရမြို့မရဲစခန်းကို တရားလိုပြုလုပ်တိုင်တန်းခဲ့ရာ ရဲစခန်းက ဆက်သွယ်ရေးဥပဒေ ပုဒ်မ-၆၆ (ဃ)နဲ့ အမှုဖွင့်ထားခဲ့ပါတယ်။
