ရခိုင်ပြည်နယ်၊ ဘူသီးတောင်မြို့နယ်မှာ ဖေဖော်ဝါရီ ၂၆ ရက် မနက်က ဗုံးပေါက်ကွဲမှု ဖြစ်ပွားပြီး တပ်မတော်အရာရှိတဦးရဲ့ ဇနီးဖြစ်သူ သေဆုံးသွားတယ်လို့ ဘူးသီးတောင်မြို့နယ် အုပ်ချုပ်ရေးမှူးက ပြောပါတယ်။
ဘူးသီးတောင်မြို့နယ် စစ်ဆင်ရေးကွပ်ကဲမှုဌာနချုပ် စကခ (၁၅)မှ ဗိုလ်မှူးကျော်စွာနဲ့ ဇနီး နန်းခင်မို့မို့ဇော်တို့ဟာ ရှမ်းပြည်နယ်မှာ မင်္ဂလာဆောင်ပြီး ဘူးသီးတောင်မြို့ကို ဖေဖော်ဝါရီ ၂၃ ရက်က စစ်တွေကနေ တဆင့် အမြန်ရေယာဉ်နဲ့ ပြန်လာခဲ့ပါတယ်။
အိမ်ထောင်ပစ္စည်းတွေကိုတော့ ကားနဲ့ စစ်တွေ၊ ရသေ့တောင်၊ ဘူးသီးတောင် ကားလမ်းက သယ်ဆောင်လာခဲ့ရာ ဖေဖော်ဝါရီ ၂၆ ရက် မနက် ၇နာရီကျော်လောက်မှာ စကခ(၁၅) ရှိ နေအိမ်ကို ပစ္စည်းတင်တဲ့ ကားရောက်ရှိလာခဲ့ပါတယ်။
မနက် ၈ နာရီလောက်က ကားပေါ်မှ ပစ္စည်းတွေကို နေအိမ်ထဲကိုသယ်ဆောင် ဧည့်ခန်းမှာ နေရာချရှင်းလင်းနေစဉ် နန်းခင်မို့မို့ဇော်က အဝတ်အစားထည့်တဲ့ ပလတ်စတစ်ပုံးအား ဖွင့်ကြည့်ရာမှာ ဗုံးပေါက်ကွဲပြီး နန်းခင်မို့မို့ဇော် နေရာမှာ သေဆုံးသွားပြီး ဗိုလ်မှူးကျော်စွာကတော့ ထိခိုက်မှုမရှိလို့ သိရပါတယ်။
ပစ္စည်းတွေတင်လာတဲ့ ကားကို လမ်းမှာ သေနတ်အရှည်ကိုင်ဆောင်ထားသူ တဦးအပါအ၀င် အရပ်ဝတ်လူ ၆ ဦးက စစ်ဆေးမေးမြန်း ပြန်လွှတ်ပေးခဲ့တယ်လို့လည်း သတင်း ထွက်ပေါ်နေပါတယ်။
ဗုံးပေါက်ကွဲမှုနဲ့ပတ်သက်ပြီး ဘူးသီးတောင်မြို့နယ် အုပ်ချုပ်ရေးမှူး ကျော်မင်းထွန်းက "ဖြစ်တာတွေ ဟုတ်ပါတယ်။ ပေါက်တာလည်း မှန်တယ်၊ သေတာလည်း ဟုတ်ပါတယ်။ ဘယ်သူတွေ ထည့်ပေးလိုက်တယ်၊ ဘယ်သူတွေ လုပ်ကြံတယ်ဆိုတဲ့ အသေးစိတ်သိလိုပါက သက်ဆိုင်ရာ တပ်ရင်းတွေကိုမေးပါ”လို့ပြောပါတယ်။
တပ်မတော်သတင်းမှန်ပြန်ကြားရေး အတွင်းရေးမှူး ဗိုလ်ချုပ်ဇော်မင်းထွန်းကို ဖုန်း ဆက်သွယ်ပေမယ့်လည်း ဖုန်းလက်ခံဖြေကြားခြင်းမရှိပါ။
ဖေဖော်ဝါရီ ၂၆ ရက် မနက် ၁၀ နာရီကျော်လောက်က ဘူးသီးတောင်မြို့နယ် ဥယာဉ်သာ ဘင်္ဂါလီကျေးရွာအနီး တိုက်ပွဲဖြစ်ပွားခဲ့တယ်လို့ ဥယျာဉ်သာကျေးရွာအုပ်ချုပ်ရေးမှူးက ပြောပါတယ်။
"မနက် ၁၀ နာရီကျော်ခန့်မှာ မိနစ် ၂၀ လောက် လက်နက်ကြီး၊ လက်နက်ငယ်သံတွေတော့ ကြားရပြီး နောင်ပိုင်းမကြားရတော့ဘူးလို့ ဆိုပါတယ်။"
၂၀၁၈ နိုဝင်ဘာလကနေ ၂၀၁၉ ဖေဖော်ဝါရီလအထိ မြန်မာ့တပ်မတော်နဲ့ ရက္ခိုင့်တပ်မတော်တို့အကြား ဘူသီးတောင်မြို့နယ်မှာ တိုက်ပွဲပေါင်း ၄၀ ကျော်ဖြစ်ပွားခဲ့ပါတယ်။
ဗညား
