ပဲခူးတိုင်းဒေသကြီး လက်ပံတန်းမြို့နယ် ရန်ကုန်-ပြည် ကားလမ်းမပေါ်မှာ မနေ့ညနေပိုင်းက အငှားယာဉ်တစီး လမ်းဘေးသစ်ပင်ကို ဝင်တိုက်ကာ မီးလောင်ကျွမ်းခဲ့ပြီး ကားပေါ်ပါလာသူ ၄ ဦးကို ကယ်ဆယ်နိုင်ခဲ့ပါတယ်။

အငှားယာဉ်ဟာ ရန်ကုန်- ပြည်ကားလမ်း မိုင်တိုင် ၈၉/၀ နှင့် ၈၉/၁ အကြားမှာ ကားဘီးပေါက်ပြီး အရှိန်မထိန်းနိုင်ဘဲ လမ်းဘေးသစ်ပင်ကို ဝင်တိုက်ကာ မီးလောင်ကျွမ်းခဲ့တာပါ။

ကားပေါ်ပါလာတဲ့ အမျိုးသမီး ၃ ဦးနဲ့ ယာဉ်မောင်းအား လက်ပံတန်းမြို့နယ် မီးသတ်တပ်ဖွဲ့၊ လူမှုကူညီကယ်ဆယ်ရေးအသင်းနဲ့ ဒေသခံပြည်သူတွေမှ ဝိုင်းဝန်းကူညီပြီး ဆေးရုံကို ပို့ပေးခဲ့ပါတယ်။

ကြေးနီကျေးရွာ ဒေသခံတဦးက “လူတွေကို ကယ်ထုတ်နေတဲ့အချိန်မှာပဲ ကားက မီးထလောင်တယ်။ အဲ့တော့မှ မီးသတ်တပ်ဖွဲ့ကို ဖုန်းဆက်အကြောင်းကြားရတယ်။ ခဏနေတော့ မီးသတ်ကားရောက်လာပြီး မီးငြှိမ်းသတ်တော့မှ ကားက မီးငြိမ်းသွားတယ်။ လူတွေကတော့ အသက်အန္တရာယ်မဖြစ်ပေမယ့် ဒဏ်ရာတွေရသွားလို့ ၄ ဦးလုံးကို ဆေးရုံပို့ပေးလိုက်ရပါတယ်" လို့ ပြောပါတယ်။

လက်ပံတန်းမြို့နယ် မီးသတ်ဦးစီးဌာန တာဝန်ရှိသူတဦးက “လူတွေကို အသက်အန္တရာယ်ကနေ ကယ်လိုက်နိုင်ပေမယ့် ကားကတော့ မီးလောင်သွားတာပေါ့။ ဆုံးရှုံးမှုတန်ဖိုး ၃၂ သိန်းကျော်ခန့်ဖြစ်မယ်" လို့ ပြောပါတယ်။

ယာဉ်မောင်း ဦးတင်စိုးကို လက်ပံတန်းမြို့နယ် ရဲတပ်ဖွဲ့စခန်းမှ ရဲအုပ်နိုင်ဝင်းက ရာဇသတ်ကြီးပုဒ်မ ၃၃၈/၃၃၇/၂၈၅ နဲ့ အမှုဖွင့်ထားပြီး ဆက်လက်စစ်ဆေးနေတယ်လို့ သိရပါတယ်။

သတင်း နှင့် ဓာတ်ပုံ - ဝဏ္ဏထွန်း